വർക്കല: ശിവഗിരി തീർത്ഥാനത്തോടനുബന്ധിച്ച് ഇന്ന് മുതൽ ജനുവരി 1വരെ വർക്കലയിൽ ഗതാഗതനിയന്ത്റണം ഏർപ്പെടുത്തി. മട്ട് ജംഗ്ഷനിൽ നിന്നും ഗുരുകുലം ജംഗ്ഷനിൽ നിന്നും ശിവഗിരിയിലേക്ക് പാസ് അനുവദിച്ചിട്ടുള്ള വാഹനങ്ങൾ മാത്രമെ കടത്തിവിടുകയുള്ളു. കല്ലമ്പലം ഭാഗത്ത് നിന്ന് വരുന്ന വാഹനങ്ങൾ നരിക്കല്ലുമുക്ക്, പാലച്ചിറ എന്നീ സ്ഥലങ്ങളിൽ നിന്നും വലത്തോട്ട് തിരിഞ്ഞ് വട്ടപ്ലാംമൂട് ജംഗ്ഷനിൽ തീർത്ഥാടകരെ ഇറക്കിയശേഷം ചെറിയ വാഹനങ്ങൾ ശിവഗിരി ഹൈസ്കൂൾ, നഴ്സിംഗ് കോളേജ് ഗ്രൗണ്ടിലും വലിയവാഹനങ്ങൾ എസ്.എൻ സെൻട്രൽ സ്കൂൾ, എസ്.എൻ കോളേജ് എന്നീ പാർക്കിംഗ് ഗ്രൗണ്ടുകളിലും പാർക്ക് ചെയ്യണം. അഞ്ചുതെങ്ങ്, കടയ്ക്കാവൂർ ഭാഗത്ത് നിന്നും വരുന്ന വാഹനങ്ങൾ മരക്കടമുക്ക് പാലച്ചിറ വഴി ഗുരുകുലം ജംഗ്ഷനിലും കൊല്ലം ഭാഗത്തു നിന്നും പാരിപ്പള്ളി വഴിയും കാപ്പിൽ വഴിയും വരുന്ന വാഹനങ്ങൾ അയിരൂർ നടയറ വഴി എസ്.എൻ കോളേജ് ജംഗ്ഷനിലെത്തി തീർത്ഥാടകരെ ഇറക്കിയശേഷം മേൽപറഞ്ഞ പ്രകാരം വാഹനം പാർക്ക് ചെയ്യേണ്ടതാണ്. വർക്കല മൈതാനത്ത് എത്തിച്ചേരുന്ന വാഹനങ്ങൾ വർക്കല പ്രൈവറ്റ് ബസ് സ്റ്റാൻഡ് ഗ്രൗണ്ടിൽ പാർക്ക് ചെയ്യണം. തിരക്ക് കുറവുളള സമയം ചെറിയ വാഹനങ്ങൾ ആയുർവേദ ആശുപത്രി ജംഗ്ഷനിൽ നിന്ന് മട്ട് ജംഗ്ഷനിൽ തീർത്ഥാടകരെ ഇറക്കിയശേഷം ഗുഡ് ഷെഡ് റോഡ് വഴി സ്റ്റാർ തീയേറ്റർ ഭാഗത്തേക്ക് പോകണം. സ്റ്റാർ തീയേറ്റർ ഭാഗത്തു നിന്ന് ഗുഡ് ഷെഡ് റോഡ് വഴി വാഹനങ്ങൾ കടത്തിവിടുന്നതല്ല. ഗുരുകുലം ജംഗ്ഷൻ മുതൽ ശിവഗിരി ആൽത്തറമുട് ജംഗ്ഷൻ വരെയും മട്ട് ജംഗ്ഷൻ മുതൽ ആൽത്തറമൂട് ജംഗ്ഷൻ വരെയും റോഡിന്റെ ഇരുവശങ്ങളിലും ഇടറോഡുകളിലും യാതൊരുവിധ പാർക്കിംഗും അനുവദിക്കുന്നതല്ലെന്ന് വർക്കല പൊലീസ് അറിയിച്ചു. വഴിയോരകച്ചവടം, ഭിക്ഷാടനം എന്നിവ കർശനമായി നിരോധിച്ചിട്ടുണ്ട്.