തിരുവനന്തപുരം: സർക്കാരിന്റെയും മനുഷ്യാവകാശ കമ്മിഷന്റെയും ഉത്തരവുണ്ടായിട്ടും ഹയർ സെക്കൻഡറിയിലെ 1000ത്തിലധികം ദിവസവേതന അദ്ധ്യാപകർക്ക് കൊവിഡ് കാലത്തെ വേതനം നൽകിയില്ലെന്ന് പരാതി. ഹൈസ്‌കൂൾതലം വരെ ഓൺലൈൻ ക്ലാസെടുത്ത അദ്ധ്യാപകർക്കൊപ്പം തങ്ങൾക്കും വേതനം നൽകണമെന്ന് ആവശ്യപ്പെട്ടിരുന്നു. വേതനം അനുവദിച്ചുകൊണ്ട് ഒക്ടോബറിൽ സർക്കാർ ഉത്തരവിറക്കിയിരുന്നു.

ഈ വർഷം ജൂൺ മുതൽ എയ്ഡഡ് ഹയർ സെക്കൻഡറിയിൽ ദിവസവേതന വ്യവസ്ഥയിൽ ജോലിചെയ്യുന്ന അദ്ധ്യാപകർക്കും വേതനം ലഭിച്ചിട്ടില്ല.

ജൂണിൽ നിയമനം നേടി 15 ദിവസത്തിനകം അംഗീകാരത്തിനായി റീജിയണൽ ഓഫീസിൽ സമർപ്പിക്കുന്ന ഫയലുകളിൽ ഡിസംബറായിട്ടും അംഗീകാരം നൽകുന്നില്ലെന്നും പരാതിയുണ്ട്. വിവിധ ജില്ലകളിൽവച്ച് നവകേരള സദസിൽ പരാതി നൽകി കാത്തിരിക്കുകയാണ് അദ്ധ്യാപകർ.