പാലക്കാട്: പോക്കാംതോട് വച്ച് മൂന്നുകിലോ കഞ്ചാവുമായി കോഴിപ്പാറ കൊഴിഞ്ഞാമ്പാറ സ്വദേശി ജോൺ ജോസഫ് എന്ന രാജു (39)​, കനാൽപിരിവ് പാമ്പംപള്ളം വാളയാർ സ്വദേശി ആന്റണി മാത്യു എന്ന കുഞ്ഞൻ എന്നിവരെ സഞ്ചരിച്ചിരുന്ന സ്കൂട്ടർ സഹിതം കസബ പൊലീസ് പിടികൂടി.

ഒഡീഷയിൽ നിന്ന് കഞ്ചാവ് വാങ്ങി കേരളത്തിൽ ചില്ലറ വിൽപ്പന നടത്തുന്നതാണ് രീതി. ക്രിസ്മസ്- പുതുവത്സര ആഘോഷങ്ങളിൽ വ്യാപകമായി വില്പന നടത്താനായാണ് കഞ്ചാവ് എത്തിച്ചത്. ജില്ലാ പൊലീസ് മേധാവി ആനന്ദിന്റെ നിർദേശപ്രകാരം എല്ലാ അതിർത്തികളിലും ലഹരി വസ്തുക്കൾ കടത്തുന്നത് തടയുന്നതിനായി പ്രത്യേക വാഹന പരിശോധന നടത്തുന്നുണ്ട്. വരും ദിവസങ്ങളിൽ കൂടുതൽ പരിശോധന നടത്തും.

ഇൻസ്പെക്ടർ എൻ.എസ്.രാജീവ്,​ എസ്.ഐ.മാരായ ബാബുരാജൻ, ഷാഹുൽ ഹമീദ്, ജതി, രജു, എസ്.സി.പി.ഒ.മാരായ ആർ.രാജീദ്,​ എസ്.ജയപ്രകാശ്, പി.പ്രിൻസ്, അശോകൻ, ശ്രീക്കുട്ടി, ഹോംഗാർഡ് ഉണ്ണി എന്നിവരാണ് പ്രതികളെ പിടികൂടിയത്. പ്രതികളെ കോടതിയിൽ ഹാജരാക്കി റിമാൻഡ് ചെയ്തു.