ചാത്തന്നൂർ: അയൽവീട്ടി​ലെ പശുവിനെ മോഷ്ടി​ച്ച് വീട്ടി​ൽ കൊണ്ടുവന്ന് കൊന്ന് ഇറച്ചി കറിവെച്ച് തിന്ന കേസി​ലെ പ്രതി പി​ടി​യി​ൽ. നെടുങ്ങോലം പോളച്ചിറ തെങ്ങുവിള തൊടിയിൽ വീട്ടിൽ ജയകൃഷ്ണനെയാണ് (26) പരവൂർ പൊലീസ് അറസ്റ്റ് ചെയ്തത്. വ്യാഴാഴ്ച രാത്രിയിലായിരുന്നു സംഭവം.

അയൽവാസിയായ പോളച്ചിറ പൊന്നൂസ് ബിൽഡിംഗ്സി​ൽ ജയപ്രസാദിന്റെ, രണ്ട് വയസും 200 കിലോയും 75,000 രൂപയും വരുന്ന സങ്കരയിനം പശുവിനെയാണ് മോഷ്ടിച്ചത്. വീട്ടിൽ കെട്ടിയിരുന്ന രണ്ട് പശുക്കളി​ൽ ഒന്നിനെയാണ് രാത്രി ജയകൃഷ്ണൻ മോഷ്ടി​ച്ച് സ്വന്തം വീട്ടി​ലെത്തി​ച്ച് അടുക്കളയിലെ ജനൽ കമ്പികളിൽ കെട്ടിയിട്ടു ചുറ്റിക കൊണ്ട് തലയ്ക്കടിച്ചും വെട്ടിയും കൊന്നത്. തുടർന്ന് ശരീരത്തിന്റെ പല ഭാഗങ്ങളിൽ നിന്നും മുൻകാലുകളിൽ ഒന്നിൽ നിന്നും മാംസം വെട്ടിയെടുത്തു കറിവച്ച് കഴി​ച്ചു. ബാക്കി ഭാഗങ്ങൾ വീട്ടിൽത്തന്നെ സൂക്ഷിക്കുകയും ചെയ്തു. ജയകൃഷ്ണൻ രാവിലെ സുഹൃത്തിനെ ഫോണിൽ വിളിച്ച് പന്നിയിറച്ചി ഉണ്ടെന്നും വന്നാൽ നൽകാം എന്നും പറഞ്ഞു. ഇതറിഞ്ഞ് സ്ഥലത്തെത്തിയ സുഹൃത്ത്‌ കണ്ടത് പശുവി​ന്റെ മാംസ ഭാഗങ്ങളായി​രുന്നു. ഇയാൾ പൊലീസ് കൺട്രോൾ റൂമിൽ വിവരം അറിയിച്ചു. രാവിലെ പശുവിനെ കാണാതായതിനെ തുടർന്ന് ഉടമസ്ഥനും നാട്ടുകാരും ചേർന്ന് കാൽപ്പാടുകൾ പിന്തുടർന്ന്‌ എത്തിയത് ജയകൃഷ്ണന്റെ വീട്ടിലായിരുന്നു. വന്നവർ അടുക്കള വാതിലിൽക്കൂടി ഉള്ളിലേക്ക് നോക്കിയപ്പോളാണ് പശുവിന്റെ മൃതദേഹം കണ്ടത്. ഈ സമയം ഇയാളുടെ ഭാര്യയും മൂന്നു മാസം പ്രായമുള്ള കുഞ്ഞും വീട്ടി​ലുണ്ടായി​രുന്നു.

തുടർന്ന് ഉടമ പോലീസിൽ പരാതി നൽകി. പരവൂർ പോലീസ് സ്ഥലത്തെത്തി പ്രതിയെ അറസ്റ്റ് ചെയ്തു. ഭാര്യയുടെ പങ്ക് പൊലീസ് അന്വേഷി​ക്കുന്നുണ്ട്. പരവൂർ സി.ഐ എ. നിസാർ, എസ്.ഐ. സി.വി.വിജയകുമാ , എസ്.സി.പി.ഒ നെൽസൺ, സയന്റിഫിക് ഓഫീസർ രാഹുൽ രാജ് എന്നിവർ സ്ഥലത്തെത്തി ഇൻക്വസ്റ്റ് തയ്യാറാക്കി . പരവൂർ മൃഗാശുപത്രിയിലെ സീനിയർ വെറ്ററി​നറി ഡോക്ടർ സാബു സേവ്യർ, ചിറക്കര മൃഗാശുപത്രിലെ ഡോ. ബിനി രാജ് എന്നിവരുടെ നേതൃത്വത്തിലുള്ള സംഘം പശുവിന്റെ മൃതദേഹം പോസ്റ്റ് മോർട്ടത്തിന് ശേഷം സംസ്കരിച്ചു.