ചേർത്തല : പട വെട്ടുന്നതിനിടെ വാൾക്കൊണ്ട് മത്സരാർത്ഥിയുടെ മുഖത്ത് മുറിവേ​റ്റിട്ടും പതറാതെ പൊരുതിയ ചേർത്തല ഹോളി ഫാമിലി ഹയർ സെക്കൻഡറി സ്‌കൂളിലെ, ഹൈസ്കൂൾ വിഭാഗം വിദ്യാർത്ഥികൾക്ക് സംസ്ഥാന സ്‌കൂൾ കലോത്സവത്തിൽ പരിച മുട്ടുകളിൽ തുടർച്ചയായി രണ്ടാം തവണയും എ ഗ്രേഡ്. കെ.എസ്.ശ്രീഹരിയെന്ന വിദ്യാർത്ഥിയുടെ പുരികത്തിന് താഴെ വാൾക്കൊണ്ട് മുറിവേ​റ്റങ്കിലും ഇത് വകവയ്ക്കാതെ മത്സരം പൂർത്തിയാക്കിയിരുന്നു. പിന്നീട് സ്‌കൂൾ അധികൃതർ കുട്ടിയെ ആശുപത്രിയിൽ എത്തിച്ചു.മുറിവിൽ രണ്ടു തുന്നൽ ഇടേണ്ടി വന്നു. നവീൻ എസ്.കിരൺ,എ.ആർ.ശരൺ,ശ്രീഹരി സന്തോഷ് കുമാർ,ടി.എസ്.വിഷ്ണു, അനന്തു എം.കൃഷ്ണ,എൻ.എസ്.അശ്വിൻ ദേവ്,ബിയോൻ ജോസഫ് എന്നിവരായിരുന്നു ടീമിലെ മ​റ്റ് അംഗങ്ങൾ.ഈ ഇനത്തിൽ കഴിഞ്ഞ തവണയും സ്‌കൂൾ എ ഗ്രേഡ് നേടിയിരുന്നു. കോട്ടയം മണർകാട് സ്വദേശി കുഞ്ഞപ്പനാണ് പരിശീലകൻ.