ചേർത്തല:അർത്തുങ്കൽ സെന്റ് ആൻഡ്രൂസ് ബസിലിക്കയിൽ വിശുദ്ധ സെബസ്ത്യാനോസിന്റെ 378ാമത് മകരം തിരുനാളിന് കൊടിയേറി.പാലായിൽ നിന്ന് നിരവധി വാഹനങ്ങളുടെ അകമ്പടിയോടെ എത്തിച്ച തിരുനാൾ പതാക ബസിലിക്കയിൽ റെക്ടർ യേശുദാസ് കാട്ടുങ്കൽ തയ്യിൽ ഏറ്റുവാങ്ങി.പിന്നീട് കടപ്പുറത്തെ കുരിശടിയിൽ നിന്ന് വാദ്യമേളങ്ങളുടെയും മുത്തുക്കുടകളുടെയും അകമ്പടിയോടെ വിശ്വാസികളും വൈദികരും ചേർന്ന് പതാക ദേവാലയത്തിലേക്ക് ആനയിച്ചു. ഭക്ത സഹസ്രങ്ങളുടെ പ്രാർത്ഥനാ മന്ത്റങ്ങൾക്കിടെ ആലപ്പുഴ രൂപത മെത്രാൻ ഡോ.ജെയിംസ് റാഫേൽ ആനാപറമ്പിൽ കൊടിയേ​റ്റി. മന്ത്രി പി.പ്രസാദ്,റെക്ടർ ഫാ.യേശുദാസ് കാട്ടുങ്കൽതയ്യിൽ,മോൺസിഞ്ഞോർ ജോയി പുത്തൻവീട്ടിൽ,ഫാ.സെലസ്റ്റിൻ പുത്തൻപുരയ്ക്കൽ,ഫാ.സെബാസ്റ്റ്യൻ വലിയവീട്ടിൽ,ഫാ.പ്രവീൺപോൾ,കൈക്കാരൻമാരായ ജോസി സ്റ്റീഫൻ,ടോമി ചിന്നപ്പൻ,വിപിൻ പോൾ തുടങ്ങിയവർ പങ്കെടുത്തു. തുടർന്ന് നടന്ന ആഘോഷമായ പൊന്തിഫിക്കൽ ദിവ്യബലിക്ക് കണ്ണൂർ രൂപത മെത്രാൻ ഡോ.അലക്സ് വടക്കുംതല മുഖ്യകാർമ്മികനായി. ഇന്ന് വനിതാദിനം. രാവിലെ 11ന് നടക്കുന്ന ആഘോഷമായ ദിവ്യബലിക്ക് ഫാ.ആന്റണി കാനപ്പിള്ളിയും,വൈകിട്ട് 6ന് ഫാ.സ്റ്റാൻലി പുളിമുട്ടുപറമ്പിലും മുഖ്യകാർമ്മികരാകും. 18ന് ചരിത്ര പ്രസിദ്ധമായ തിരുസ്വരൂപ നടതുറക്കൽ,രാവിലെ 5ന് നടതുറയ്ക്കൽ തിരുസ്വരൂപ വന്ദനം ഫാ.പോൾ ജെ. അറയ്ക്കൽ മുഖ്യകാർമികത്വം വഹിക്കും.ഫാ.സെബാസ്റ്റ്യൻ ശാസ്താംപറമ്പിൽ വചനപ്രഘോഷണം നടത്തും.വൈകിട്ട് 6ന് ആഘോഷമായ പൊന്തിഫിക്കൽ ദിവ്യബലി പുനലൂർ രൂപത ബിഷപ്പ് റവ.ഡോ.സെൽവിസ്റ്റർ പൊന്നുമുത്തൻ മുഖ്യകാർമ്മികത്വം വഹിക്കും.
20ന് തിരുനാൾ ഉത്സവദിനം രാവിലെ 6.45ന് ആഘോഷമായ പൊന്തിഫിക്കൽ ദിവ്യബലി, ആലപ്പുഴ രൂപത ബിഷപ്പ് ഡോ. ജെയിംസ് റാഫേൽ ആനാപറമ്പിൽ മുഖ്യകാർമ്മികത്വം വഹിക്കും. വൈകിട്ട് 3ന് ആഘോഷമായ പൊന്തിഫിക്കൽ ദിവ്യബലിക്ക് കൊല്ലംരൂപത ബിഷപ്പ് ഡോ.സ്റ്റാൻലി റോമൻ മുഖ്യകാർമ്മികത്വം വഹിക്കും. 4.30ന് ആഘോഷമായ തിരുനാൾ പ്രദക്ഷിണം,ഫാ.സെബാസ്റ്റ്യൻ ഷാജി ചുള്ളിക്കൽ,ഫാ.സെബാസ്റ്റ്യൻ ജൂഡോ മൂപ്പശേരിയിൽ,ഫാ.സെബാസ്റ്റ്യൻ ക്ലമന്റ് കുറ്റിവീട്ടിൽ എന്നിവർ മുഖ്യകാർമ്മികരാകും. രാത്രി 10ന് ആഘോഷമായ ദിവ്യബലിക്ക് ഫാ. ജോർജ് ബിബിലൻ ആറാട്ടുകുളം മുഖ്യകാർമ്മികത്വം വഹിക്കും.27ന് കൃതജ്ഞതാദിനം രാത്രി 10.30ന് കൃതജ്ഞതാ സമൂഹ ദിവ്യബലിക്ക് റെക്ടർ ഡോ.യേശുദാസ് കാട്ടുങ്കൽത്തയ്യിൽ മുഖ്യകാർമ്മികനാകും,റവ. ഡോ.സെലസ്റ്റിൻ പുത്തൻപുരയ്ക്കൽ വചനപ്രഘോഷണം നടത്തും.