മുഹമ്മ: സംസ്ഥാന സ്കൂൾ പവർ ലിഫ്റ്റിംഗ് മത്സരത്തിൽ മുഹമ്മ എ.ബി വിലാസം സ്കൂളിലെ താരങ്ങൾ പൊന്നണിഞ്ഞു. സ്പോർട്സ് അക്കാഡമി നേതൃത്വത്തിൽ സ്കൂളിലെ എ.ബി.വി ജിമ്മിൽ പരിശീലനം നേടിയാണ് ഇവർ നാടിന്റെ അഭിമാനം ഉയർത്തിയത്. പ്ലസ് വൺ വിദ്യാർത്ഥിനി ഡി.ആർച്ച 57 കിലോ വിഭാഗത്തിലും പ്ലസ് ടു വിദ്യാർത്ഥിനി എസ്.ആർദ്ര 52 കിലോയിലും സ്വർണം നേടി. മഹാത്മാഗാന്ധി യൂണിവേഴ്സിറ്റി പവർ ലിഫ്റ്റിംഗ് മത്സരത്തിൽ അങ്കമാലി മോണിംഗ് സ്റ്റാർ കോളേജ് ഒന്നാം വർഷ ബിരുദ വിദ്യാർത്ഥിനി അനാമിക അജിത് 69 കിലോയിലും കേരള യൂണിവേഴ്സിറ്റി മത്സരത്തിൽ പത്തനാപുരം അയ്യങ്കാളി മെമ്മോറിയൽ ആർട്സ് ആൻഡ് സയൻസ് കോളേജിലെ മൂന്നാം വർഷ ബിരുദ വിദ്യാർത്ഥിനി എ.തേജസ്‌ 63 കിലോയിലും സ്വർണം കരസ്ഥമാക്കി.ഇവരെല്ലാവരും കായികാദ്ധ്യാപകൻ വി.സവിനയന്റെ ശിക്ഷണത്തിൽ പരിശീലനം നേടുന്നവരാണ്. മുഹമ്മ കൊല്ലംവെളിയിൽ ധർമ്മജി -അമ്പിളി ദമ്പതികളുടെ മകളാണ് ഡി.ആർച്ച. മാരാരിക്കുളം വടക്ക് പഞ്ചായത്ത്‌ മണങ്ങശേരി സുഖലാലിന്റെയും അനിതയുടെയും മകളാണ് എസ്. ആർദ്ര.മുഹമ്മ ആര്യക്കര ആലയ്ക്കൽവെളി അജിത് ഷീന ദമ്പതികളുടെ മകളാണ് അനാമിക അജിത്.മുഹമ്മ കായിപ്പുറം മംഗലത്ത്വെളി ബി.പൊന്നപ്പന്റെയും പി.എസ്.അജിതയുടെയും മകളാണ് എ.തേജസ്‌.