ഹരിപ്പാട്: എസ്.എൻ.ഡി.പി യോഗം കാർത്തികപ്പള്ളി യൂണിയനിലെ സ്നേഹ മാര്യേജ് കൗൺസിലിംഗ് സെന്ററിന്റേയും എറണാകുളം മുക്തിഭവൻ കൗൺസിലിംഗ് സെന്ററിന്റേയും സംയുക്താഭിമുഖ്യത്തിൽ, നടത്തിവരുന്ന വിവാഹപൂർവകോഴ്‌സിന്റെ 78-ാംമത് ബാച്ച് 20, 21 തീയതികളിൽ യൂണിയൻ കോൺഫറൻസ് ഹാളിൽ നടക്കും. ആനന്ദം കുടുംബജീവിതത്തിൽ,ഗുരുദേവന്റെ ദാമ്പത്യവീക്ഷണം എന്നീ വിഷയങ്ങളിൽ പ്രൊഫ.കൊടുവഴങ്ങ ബാലകൃഷ്‌ണനും ഗർഭധാരണം,പ്രസവം ,ശിശുപരിപാലനം എന്നീ വിഷയങ്ങളിൽ ഡോ.പി.എൻ.ശരത്‌ചന്ദ്രനും കുടുംബജീവിതത്തിലെ സങ്കൽപങ്ങളും യാഥാർത്ഥ്യങ്ങളും, കുടുംബ ബഡ്‌ജറ്റ്‌ എന്നീ വിഷയങ്ങളിൽ രാജേഷ് പൊന്മലയും എസ്. എൻ.ഡി.പി.യോഗ ചരിത്രം എന്ന വിഷയത്തിൽ വി.എം.ശശിയും, സ്ത്രീപുരുഷ മനശാസ്ത്രം എന്ന വിഷയത്തിൽ ഷൈലജ രവീന്ദ്രനും ക്ലാസ് നയിക്കും. യൂണിയൻ പ്രസിഡന്റ് കെ.അശോകപ്പണിക്കർ അദ്ധ്യക്ഷനാകും. ഹരിപ്പാട് എസ്.ഐ ഡി.സജി ഉദ്ഘാടനം ചെയ്യും. യൂണിയൻ സെക്രട്ടറി അഡ്വ.ആർ.രാജേഷ്‌ ചന്ദ്രൻ സ്വാഗതം പറയും. യൂണിയൻ വൈസ് പ്രസിഡന്റ് എം.സോമൻ മുഖ്യപ്രഭാഷണം നടത്തും. കോ-ഓർഡിനേറ്റർ പി.ശ്രീധരൻ നന്ദി പറയും.