ഹരിപ്പാട്: എസ്.എൻ.ഡി.പി യോഗം 994ാം നമ്പർ മുട്ടം ശാഖ ഗുരുമന്ദിരത്തിന്റെയും മുട്ടം ശ്രീരാമകൃഷ്ണാശ്രമത്തിന്റെയും സംയുക്ത വാർഷിക ആഘോഷങ്ങളുടെ ഭാഗമായി നടന്ന സ്വാമി ശങ്കരാനന്ദയുടെ സമാധി ദിനാചരണം ചേപ്പാട് യൂണിയൻ പ്രസിഡന്റ് എസ്.സലികുമാർ ഉദ്ഘാടനം ചെയ്തു. ആശ്രമം പ്രസിഡന്റ് ബി.നടരാജൻ അദ്ധ്യക്ഷനായി . യൂണിയൻ സെക്രട്ടറി എൻ.അശോകൻ മുഖ്യപ്രസംഗം നടത്തി. മുട്ടം സുരേഷ് ശാന്തി, എസ്. എൻ ട്രസ്റ്റ് ബോർഡ് അംഗം മുട്ടം ബാബു, ബി.രഘുനാഥൻ, ജി.ഗോപാലകൃഷ്ണൻ, ആലുംമൂട്ടിൽ തറവാട്ടിലെ ഇപ്പോഴത്തെ കാർണവർ ഡോ.ശിവദാസൻ ചാന്നാർ എന്നിവർ അനുസ്മരണ പ്രസംഗം നടത്തി. കൺവീനർ വി.നന്ദകുമാർ സ്വാഗതവും വനിതാ സംഘം സെക്രട്ടറി സുമ സുരേഷ് നന്ദിയും പറഞ്ഞു. ഉച്ചയ്ക്ക് ഗുരുപൂജ പ്രസാദ വിതരണം, വൈകിട്ട് തിരുവാതിര കളി മത്സരങ്ങൾ എന്നിവ നടന്നു. അയ്യപ്പൻ കൈപ്പള്ളിൽ സമ്മാനദാനം നിർവഹിച്ചു . ഇന്ന് ആശ്രമ വാർഷികം നടക്കും. രാവിലെ 7ന് മുട്ടം സുരേഷ് ശാന്തി, മഹിളാമണി എന്നിവരുടെ മുഖ്യകാർമ്മികത്വത്തിൽ ബിംബശുദ്ധി പൂജ, കലശപൂജ, കലശാഭിഷേകം, 10.30ന് വെഞ്ഞാറമൂട് ശ്രീനാരായണ തപോവനം മഠാധിപതി സ്വാമി പ്രണവസ്വരൂപാനന്ദ , മഹിളാമണി എന്നിവരുടെ പ്രഭാഷണം. ശ്രീരാമകൃഷ്ണ മഠത്തിന്റെ മൂലസ്ഥാനമായ കൊൽക്കത്ത ബേലൂർ മഠത്തിൽ നിന്ന് ദിവ്യ പൂജയും പ്രാർത്ഥനയും നടത്തിയ പുണ്യശില സന്യാസ ശ്രേഷ്ഠന്മാരിൽ നിന്ന് ആശ്രമ ഭാരവാഹികൾ ഏറ്റുവാങ്ങും. രാവിലെ 11.46 നും ഉച്ചയ്ക്ക് 12.32 നും മദ്ധ്യേ ഒറ്റപ്പാലം ശ്രീരാമകൃഷ്ണാശ്രമത്തിലെ സ്വാമി ധർമ്മ സ്വരൂപാനന്ദ ശിലാന്യാസം നിർവഹിക്കും. 1ന് ഗുരുപൂജ, പ്രസാദ വിതരണം. വൈകിട്ട് 3ന് ഭജൻസ്, 5.30ന് ഘോഷയാത്രയും ദേശതാലപ്പൊലിയും. രാത്രി 8ന് കൊടിയിറക്ക് എന്നിവ നടക്കും.