മാവേലിക്കര: കുറത്തികാട് ഹൈസ്‌കൂൾ ജംഗ്ഷനിൽ കാറും ബൈക്കും കൂട്ടിയിടിച്ച് വിദ്യാർത്ഥി മരിച്ചു. ചെറുകുന്നം നെടുവേലിൽ തെക്കതിൽ സന്തോഷിന്റെയും കവിതയുടെയും മകൻ അതുൽ സന്തോഷ് (20) ആണ് മരിച്ചത്. ബൈക്കിൽ ഒപ്പമുണ്ടായിരുന്ന കുറത്തികാട് ആരോമൽ ഭവനത്തിൽ രാജീവിന്റെയും വസന്തയുടെയും മകൻ ആരോമൽ (21) തലയ്ക്ക് ഗുരുതര പരിക്കേറ്റ് പരുമലയിലെ സ്വകാര്യ ആശുപത്രിയിൽ ചികിത്സയിലാണ്. ചൊവ്വാഴ്ച രാത്രിയിലായിരുന്നു അപകടം.
തലയ്ക്ക് ഗുരുതരമായി പരിക്കേറ്റ ഇരുവരെയും മാവേലിക്കര ജില്ലാ ആശുപത്രിയിൽ എത്തിച്ചെങ്കിലും അതുൽ സന്തോഷിനെ രക്ഷിക്കാനായില്ല. നാട്ടകം ഗവ.കോളേജിലെ വിദ്യാർത്ഥിയാണ്. സഹോദരി: അനാമിക.