ചാരുംമൂട്: ഏത്തക്കുലകളും കരിക്കും വെറ്റിലയടുക്കും അടയും വഴിപാടായി സമർപ്പിച്ച് തെക്കേതളത്തിൽ വല്യച്ഛന്റെ അനുഗ്രഹം തേടി ദേശക്കാർ. മാവേലിക്കര താലൂക്കിൽ താമരക്കുളം ചത്തിയറ ശക്തികുളങ്ങര ശ്രീ ഭുവനേശ്വരി ദേവീ ക്ഷേത്രാങ്കണത്തിലാണ് തെക്കേതളത്തിൽ വല്യച്ഛന്റെ ക്ഷേത്രം. ഇവിടെയാണ് പൂജയ്ക്കായി അപൂർവ്വമായ വഴിപാട് സമർപ്പണം നടന്നു വരുന്നത്. ചത്തിയറ ദേശത്ത് ജീവിച്ചിരുന്ന അമാനുഷികനായിരുന്ന വല്യച്ഛന്റെ സംരക്ഷണവും അനുഗ്രഹവും ഇപ്പോഴും ദേശത്തുണ്ടെന്നാണ് വിശ്വാസം. വർഷത്തിലൊരിക്കലാണ് വല്യച്ഛൻ പൂജ .ക്ഷേത്ര തന്ത്രി വൈക്കം നാഗമ്പൂഴിമന ഹരി ഗോവിന്ദൻ നമ്പൂതി പൂജയ്ക്ക് മുഖ്യകാർമ്മികത്വം വഹിച്ചു. ആയിരക്കണക്കിന് ഏത്തക്കുലകളാണ് ഭക്തർ പൂജയ്ക്കായി എത്തിച്ചത്. പൂജയുടെ ഭാഗമായി ക്ഷേത്ര ഉപദേശക സമിതി വിപുലമായ ക്രമീകരണങ്ങളാണ് ഒരുക്കിയിരുന്നത്. പ്രസിഡന്റ് കെ.വിജയകുമാർ, സെക്രട്ടറി വി.രാമചന്ദ്ര കുറുപ്പ്, വൈസ് പ്രസിഡന്റ് സരസൻ , ദേവസ്വം ബോർഡ് ഉദ്യോഗസ്ഥർ, ഉപദേശക സമിതിയംഗങ്ങൾ തുടങ്ങിയവർ നേതൃത്വം നൽകി.