മാന്നാർ: ഇന്ത്യയിലെ മുഴുവൻ കർഷകരുടേയും കാർഷിക മേഖലയുടെയും സമഗ്രമായ വികസനം ലക്ഷ്യമാക്കി കേന്ദ്ര ഡിജിറ്റൽ കാർഷിക വിവരസങ്കേതം (അഗ്രിസ്റ്റാക്ക്) പദ്ധതിയുടെ ഭാഗമായുള്ള റാബി സീസണിലെ ഡിജിറ്റൽ ക്രോപ് സർവേക്ക് മാന്നാറിൽ തുടക്കമായി. ഐ.ടി അധിഷ്ഠിത സാങ്കേതിക വിദ്യകളെയും വിവിധ ഡേറ്റാബേസുകളെയും സമാഹരിച്ചു കേന്ദ്രസർക്കാർ ആവിഷ്കരിച്ച് നടപ്പിലാക്കുന്നതാണ് ഡിജിറ്റൽ ക്രോപ്പ് സർവേ. മാന്നാർ കൃഷിഭവന്റെ കീഴിലുള്ള മാന്നാർ വില്ലേജിലെ 11വാർഡുകളിലും കുരട്ടിശ്ശേരി വില്ലേജിലെ ഏഴു വാർഡുകളിലുമാണ് ക്രോപ്പ് സർവേ നടപ്പിലാക്കുന്നത്. മാന്നാർ പഞ്ചായത്തിൽ തിരഞ്ഞെടുത്ത സർവേയർമാർക്കും കൃഷി ഉദ്യോഗസ്ഥർക്കും ഐ.ടി സെൽ ഡെപ്യുട്ടി മാനേജർ പ്രദീപ് മാന്നാറിലെത്തി ഫീൽഡുതല പരിശീലനം നടത്തി. പരിശീലനം ലഭിച്ച സർവ്വേ വാളന്റിയർമാർ വരും ദിവസങ്ങളിൽ മാന്നാർ പഞ്ചായത്തിലെ കൃഷിയിടങ്ങൾ സന്ദർശിച്ചു സർവേ നടത്തും. മൂന്നു തലങ്ങളിലായുള്ള അഗ്രി സ്റ്റാക്കിന്റെ വികസനത്തിൽ ഒന്നാംഘട്ടത്തിൽ കൃഷിവകുപ്പിന്റെ എയിംസ് പോർട്ടിലിൽ രജിസ്റ്റർ ചെയ്തിട്ടുള്ള കർഷകരുടെ വ്യക്തിഗത വിവരങ്ങളോടൊപ്പം അവരുടെ ഭൂമി സംബന്ധിച്ച വിവരങ്ങൾ കൂടി റവന്യൂവകുപ്പിന്റെ ഡാറ്റയുമായി പരിശോധിച്ചു ഉറപ്പു വരുത്തിയതിനു ശേഷം അഗ്രിസ്റ്റാക്കിലേക്ക് കൂട്ടിച്ചേർക്കുന്നു. രണ്ടാംഘട്ടത്തിൽ കർഷകരുടെ കൃഷിഭൂമിയുടെ വിവരങ്ങൾ റവന്യൂവകുപ്പിന്റെ ഡിജിറ്റൽ വില്ലേജ് മാപ്പുകളിൽ അടയാളപ്പെടുത്തും. ഓരോ കൃഷിയിടത്തിലും ഉള്ള വിളകളുടെ വിശദാംശങ്ങൾ ശേഖരിച്ച് കൃഷിയുടെ വിവരങ്ങളിൽ ഉൾപ്പെടുത്തുകയാണ് മൂന്നാംഘട്ടത്തിൽ ചെയ്യുന്നത്.

........

സർവേ വിവരങ്ങൾ ലഭ്യമായിക്കഴിഞ്ഞാൽ അർഹരായ കർഷകർക്ക് വിവിധ സംസ്ഥാന-കേന്ദ്ര പദ്ധതികളുടെ ആനുകൂല്യങ്ങൾ, കൃത്യതയോടെ നൽകുവാനും നയപരമായ തീരുമാനങ്ങൾ കൈക്കൊള്ളുന്നതിനും കഴിയും. ഡിജിറ്റൽ ക്രോപ്പ് സർവേ വിജയപ്രദമായി നടപ്പിലാക്കി പൂർത്തീകരിക്കുന്നതിന് മാന്നാർ പഞ്ചായത്തിലെ മുഴുവൻ പേരുടെയും സഹകരണം ഉണ്ടാകം.

പി.സി ഹരികുമാർ,മാന്നാർ കൃഷി ഓഫീസർ