ഹരിപ്പാട് : തീരദേശത്ത് കുടിവെള്ളക്ഷാമം രൂക്ഷമായതോടെ പ്രതിഷേധം ശക്തമാക്കി നാട്ടുകാർ. ആറാട്ടുപുഴ പഞ്ചായത്ത് ഏഴ്, എട്ട് വാർഡുകൾ ഉൾപ്പെടുന്ന വലിയഴിക്കൽ, തറയിൽ കടവ് ഭാഗത്തെ ശുദ്ധജലക്ഷാമത്തിന് പരിഹാരം കാണണമെന്ന് ആവശ്യപ്പെട്ട് പഞ്ചായത്തിന്റെ പതിനാലാം നമ്പർ റോഡും വലിയഴിക്കലിൽ തീരദേശ റോഡും കഴിഞ്ഞ ദിവസം നാട്ടുകാർ ഉപരോധിച്ചു.
ശുദ്ധജലം എത്തിക്കുന്ന വാഹനം തടഞ്ഞശേഷമാണ് സ്ത്രീകൾ അടക്കമുള്ള നാട്ടുകാർ പതിനാലാം നമ്പർ റോഡ് ഉപരോധിച്ചത്. രണ്ടു മണിക്കൂർ സമരം നടത്തിയിട്ടും അധികാരികൾ സ്ഥലത്ത് എത്താതിരുന്നതിനെ തുടർന്ന് തീരദേശ റോഡ് ഉപരോധിച്ചു. തൃക്കുന്നപ്പുഴ പൊലീസ് എത്തി സമരക്കാരുമായി ചർച്ച നടത്തി. തുടർന്നാണ് ഉപരോധം അവസാനിപ്പിച്ചത്. സമരസമിതി ഭാരവാഹികളുമായി ബുധനാഴ്ച പൊലീസ് ഉദ്യോഗസ്ഥർ ചർച്ച നടത്തും. കഴിഞ്ഞ രണ്ടുമാസമായി വലിയഴീക്കൽ, തറയിൽ കടവ് ഭാഗത്ത് ശുദ്ധജലക്ഷാമം അനുഭവപ്പെടുകയാണെന്നും ഈ ഭാഗങ്ങളിലെ കുഴൽക്കിണറുകൾ പ്രവർത്തനരഹിതമാണെന്നും നാട്ടുകാർ പറഞ്ഞു.
കുടിവെള്ളം മുട്ടിയിട്ട് രണ്ട് മാസം
ആറാട്ടുപുഴയുടെ തീരദേശ വാർഡുകളിൽ കുടിവെള്ളക്ഷാമം രൂക്ഷമായിട്ട് രണ്ട് മാസം
പൈപ്പ് ജലത്തെ മാത്രം ആശ്രയിക്കുന്ന ഇവിടെ നാട്ടുകാർ അനുഭവിക്കുന്ന ദുരിതം വളരെ വലുതാണ്
ടാങ്കറിൽ ശുദ്ധജലം ഇടയ്ക്കിടെ വിതരണം ചെയ്യുന്നുണ്ടെങ്കിലും അതുകൊണ്ട് പരിഹാരമാകുന്നില്ല
ജല അതോറിട്ടി ഗുരുതര അനാസ്ഥയാണ് കാട്ടുന്നതെന്നാണ് നാട്ടുകാരുടെ ആരോപണം
കുടിവെള്ളപ്രശ്നത്തിന് സ്ഥായിയായ പരിഹാരം ഒരാഴ്ചയ്ക്കകം ഉണ്ടായില്ലെങ്കിൽ പഞ്ചായത്ത് ഓഫീസിന് മുന്നിലും വാട്ടർ അതോറിട്ടി ഓഫീസിന് മുന്നിലും ശക്തമായ സമരം ആരംഭിക്കും
- ആറാട്ടുപുഴ സൗത്ത് മണ്ഡലം കോൺഗ്രസ് കമ്മിറ്റി പ്രസിഡന്റ്