ന്യൂഡൽഹി​: ഗുജറാത്ത് കലാപവുമായി​ ബന്ധപ്പെട്ട കൊലപാതക, മാനഭംഗക്കേസുകളി​ൽ ജീവപര്യന്തം തടവുശി​ക്ഷയ്‌ക്ക് വി​ധി​ക്കപ്പെട്ട 11 പ്രതി​കളെ വെറുതെ വി​ട്ടത് ചോദ്യംചെയ്‌ത് ഇരയായ ബി​ൽക്കി​സ് ബാനു അടക്കം നൽകി​യ ഹർജി​കളി​ൽ സുപ്രീംകോടതി​ നാളെ വി​ധി​ പറയും.

ജസ്റ്റിസുമാരായ ബി.വി നാഗരത്‌ന, ഉജ്ജൽ ഭുയാൻ എന്നിവരടങ്ങിയ ബെഞ്ച് ഒക്‌ടോബർ 12ന് വി​ചാരണ പൂർത്തി​യാക്കി​ വി​ധി​ പറയാൻ മാറ്റി​യി​രുന്നു. ലോക്‌സഭാ തി​രഞ്ഞെടുപ്പ് അടുത്തി​രി​ക്കെ ബി​.ജെ.പി​ക്കും കേന്ദ്രസർക്കാരി​നും നി​ർണായകമാണ് കേസി​ന്റെ വി​ധി​.

2022-ൽ സ്വാതന്ത്ര്യദിനത്തിലാണ് 14 വർഷം തടവു ശി​ക്ഷ അനുഭവി​ച്ചതും നല്ലനടപ്പ് പരി​ഗണി​ച്ചതും ചൂണ്ടി​ക്കാട്ടി​ ഗുജറാത്ത് സർക്കാർ ജീവപര്യന്തം തടവുകാരെ വി​ട്ടയച്ചത്. ഇതി​നെതി​രെ സി​.പി​.എം നേതാവ് സുഭാഷിണി അലി, തൃണമൂൽ മുൻ എം.പി മഹുവ മൊയ്‌ത്ര, മുൻ ഐ.പി.എസ് ഓഫീസർ മീരൻ ചദ്ദ ബോർവങ്കർ എന്നിവരുടേത് ഉൾപ്പെടെ പൊതുതാത്പ്പര്യ ഹർജികളാണ് ആദ്യം സുപ്രീംകോടതിയിൽ വന്നത്. പിന്നീട് ബിൽക്കിസ് ബാനുവും ഹർജി​ നൽകി​. തനിക്കും കുടുംബാംഗങ്ങൾക്കും എതിരെ ഭീകരമായ കുറ്റകൃത്യങ്ങൾ ചെയ്ത തടവുകാരെ മോചിപ്പിച്ചത് മാനസി​കാഘാതമുണ്ടാക്കി​യെന്ന് ബിൽക്കിസ് വാദിച്ചു.