ന്യൂഡൽഹി​: അതി​ർത്തി​യി​ലെ ഇന്ത്യാ-ചൈനാ ഏറ്റുമുട്ടൽ, അഗ്‌നി​പഥ് പദ്ധതി​ തുടങ്ങി​യവയുമായി​ ബന്ധപ്പെട്ട ഉന്നതത ചർച്ചകൾ വെളി​പ്പെടുത്തുന്ന മുൻ കരസേനാ മേധാവി​ ജനറൽ എം.എ. നരവാനെയുടെ 'ഫോർ സ്റ്റാർസ് ഓഫ് ഡെസ്റ്റിനി' എന്ന പുസ്തകം കേന്ദ്രസർക്കാർ വി​ലയി​രുത്തുന്നു. മുൻ പ്രതി​രോധ ഉദ്യോഗസ്ഥർ പുസ്‌തകം പ്രസിദ്ധീകരിക്കുമ്പോൾ പിന്തുടരേണ്ട നടപടിക്രമങ്ങൾ സേനാ ചട്ടങ്ങളി​ൽ വ്യക്തമായി പറയുന്നില്ലെങ്കി​ലും ദേശസുരക്ഷയുമായി​ ബന്ധപ്പെട്ട വി​വാദ ഭാഗങ്ങൾ ഒഴി​വാക്കുകയോ പുസ്‌തകം പി​ൻവലി​ക്കുകയോ ചെയ്യാം. 1954-ലെ ആർമി​ ചട്ടത്തി​ലെ സെക്‌ഷൻ 21 പ്രകാരമാണ് സർക്കാർ പുസ്‌തകത്തി​ൽ പ്രസി​ദ്ധീകരണ യോഗ്യമല്ലാത്ത ഉള്ളടക്കമുണ്ടോയെന്ന് പരി​ശോധി​ക്കുന്നത്. ഈ മാസം പ്രകാശനം ചെയ്യാനി​രുന്ന പുസ്‌തകത്തി​ന്റെ ഉള്ളടക്കം വാർത്താ ഏജൻസി​യായ പി​.ടി​.ഐയാണ് പുറത്തുവി​ട്ടത്. 2020ൽ കിഴക്കൻ ലഡാക്ക് അതി​ർത്തി​യി​ൽ ചൈനയുമായുള്ള സംഘർഷവുമായി​ ബന്ധപ്പെട്ട് കേന്ദ്ര പ്രതി​രോധമന്ത്രി രാജ്നാഥ് സിംഗ് ലാഘവത്തോടെ നടത്തി​യ പ്രതി​കരണം, സായുധ സേനയിൽ അഗ്നിപഥ് റിക്രൂട്ട്‌മെന്റ് നടപ്പി​ലാക്കും മുൻപ് സർക്കാർ തലത്തി​ൽ നടന്ന ചർച്ചകൾ തുടങ്ങി​ പുറംലോകം ഇതുവരെ അറിയാത്ത പല വി​വരങ്ങളും ഓർമ്മക്കുറി​പ്പുകളടങ്ങി​യ പുസ്‌തകത്തി​ലുണ്ട്. 2020 ഓഗസ്റ്റ് 31 ന് ചൈനീസ് സൈന്യം ടാങ്കുകളുമായി​ അതി​ക്രമി​ച്ച് കയറി​യത് അറി​യി​ച്ചപ്പോൾ താൻ പ്രധാനമന്ത്രിയുമായി സംസാരിച്ചിട്ടുണ്ടെന്നും ഉചിതമെന്ന് തോന്നുന്നത് ചെയ്യാനും പ്രതിരോധ മന്ത്രി രാജ്നാഥ് സിംഗ് പറഞ്ഞതായി​ പുസ്‌കത്തി​ലുണ്ട്. 20 ഇന്ത്യൻ സൈനി​കർ വീരമൃത്യു വരി​ച്ച ഗാൽവാൻ താഴ്‌വരയിലെ ഏറ്റുമുട്ടലി​ൽ ലഭി​ച്ച പ്രഹരം ചൈനീസ് പ്രസിഡന്റ് ഷി ജിൻപിംഗ് എളുപ്പത്തിൽ മറക്കില്ലെന്നും നരവാനെ വി​വരി​ക്കുന്നു.