തൃപ്പൂണിത്തുറ: പൂത്തോട്ട ശ്രീനാരായണ പബ്ലിക് സ്കൂളിലെ 'മാത്രനോട്സ്' ഗണിതശാസ്ത്ര ക്ലബ്ബിന്റെ നേതൃത്വത്തിൽ 'സ്ക്വിർക്കിൾ 2024' ഇന്റർസ്കൂൾ മാത്‌സ് ചലഞ്ച് സംഘടിപ്പിച്ചു. മൂന്ന് മത്സരയിനങ്ങളിലായി പത്തോളം സ്കൂളുകൾ പങ്കെടുത്തു. ടീഷർട്ട് ഡിസൈൻ മത്സരത്തിൽ പൂത്തോട്ട ശ്രീനാരായണ പബ്ലിക് സ്കൂൾ, വൈറ്റില ടോക് -എച്ച് പബ്ലിക് സ്കൂൾ, തിരുവാണിയൂർ കൊച്ചിൻ റിഫൈനറി സ്കൂൾ എന്നിവർ ഒന്നും രണ്ടും മൂന്നും സ്ഥാനം സ്വന്തമാക്കി.

ക്വിസ് മത്സരത്തിൽ കാക്കനാട് ഭവൻസ് ആദർശ വിദ്യാലയ ഒന്നാം സ്ഥാനവും തിരുവാണിയൂർ കൊച്ചിൻ റിഫൈനറി സ്കൂൾ രണ്ടാം സ്ഥാനവും വെള്ളൂർ ഭവൻസ് ന്യൂസ്പ്രിന്റ് വിദ്യാലയ മൂന്നാം സ്ഥാനവും നേടി. കൊളാഷ് നിർമ്മാണ മത്സരത്തിൽ തിരുവാണിയൂർ കൊച്ചിൻ റിഫൈനറി ഒന്നാം സ്ഥാനവും ശ്രീനാരായണ പബ്ലിക് സ്കൂൾ രണ്ടാം സ്ഥാനവും ഭവൻസ് ആദർശ വിദ്യാലയ മൂന്നാം സ്ഥാനവും കരസ്ഥമാക്കി.

ശ്രീനാരായണ ഇൻസ്റ്റിറ്റ്യൂഷൻസ് മാനേജർ ഇ.എൻ. മണിയപ്പൻ, വൈസ് പ്രസിഡന്റ് എ.ഡി. ഉണ്ണിക്കൃഷ്ണൻ എന്നിവർ സമ്മാനദാനം നിർവഹിച്ചു. സ്കൂൾ പ്രിൻസിപ്പൽ വി.പി. പ്രതീത, അക്കാഡമിക് കോ ഓർഡിനേറ്റർ സുരേഷ് എം. വേലായുധൻ, വൈസ് പ്രിൻസിപ്പൽ പി.എൻ. സീന എന്നിവർ സംസാരിച്ചു.