കൊച്ചി: യൂത്ത്‌ കോൺഗ്രസ് സംസ്ഥാന പ്രസിഡന്റ് രാഹുൽ മങ്കൂട്ടത്തിലിന്റെ അറസ്റ്റിൽ പ്രതിഷേധിച്ച് എറണാകുളം ജില്ലാ കമ്മിറ്റിയുടെ നേതൃത്വത്തിൽ നടത്തിയ കമ്മിഷണർ ഓഫിസ് മാർച്ച് അക്രമാസക്തമായി. പ്രവർത്തകർ പൊലീസിനെ കല്ലെറിഞ്ഞു. ബാരിക്കേഡ് മറിച്ചിടാൻ പ്രവർത്തകർ ശ്രമിച്ചതോടെ പൊലീസ് നാല് തവണ ജലപീരങ്കി പ്രയോഗിച്ചു. കല്ലേറിൽ പൊലീസുകാർക്ക് പരിക്കില്ല. ഇന്നലെ രാവിലെ 12ന് ഡി.സി.സി ഓഫീസ് പരിസരത്തുനിന്ന് ജില്ലാ പ്രസിഡന്റ് സിജോ ജോസഫിന്റെ നേതൃത്വത്തിൽ നടന്ന പ്രതിഷേധ മാർച്ച് ഹൈബി ഈഡൻ എം.പി ഉദ്ഘാടനം ചെയ്തു.

പ്രതിഷേധമാർച്ച് കോർപ്പറേഷൻ ഓഫീസിന് സമീപം പൊലീസ് തടഞ്ഞതോടെയാണ് പ്രവർത്തകർ കല്ലെറിഞ്ഞത്. തുടർന്ന് റോഡിൽ കുത്തിയിരുന്ന് പ്രതിഷേധിച്ചു. പിരിഞ്ഞുപോകാൻ സമരക്കാർ കൂട്ടാക്കാതെ വന്നതോടെ ജലപീരങ്കി പ്രയോഗിച്ചു.

യൂത്ത്‌ കോൺഗ്രസ് ജില്ലാ വൈസ് പ്രസിഡന്റ് കെ.പി. ശ്യാം, ഡി.സി.സി പ്രസിഡന്റ് മുഹമ്മദ് ഷിയാസ്, എം.എൽ.എമാരായ അൻവർ സാദത്ത്, റോജി എം. ജോൺ തുടങ്ങിയവർ മാർച്ചിൽ പങ്കെടുത്തു.