കൊച്ചി: സംസ്ഥാനത്തെ ഫ്ളാറ്റുകളുടെ മുകൾ നി​ലകളി​ൽ തീപിടിച്ചാൽ നിസഹായരാകുന്ന അഗ്നി​രക്ഷാ സേന രക്ഷാപ്രവർത്തനത്തിനായി ഏരി​യൽ പ്ളാറ്റ്ഫോമുകൾ (സ്കൈ ലി​ഫ്റ്റ്) വാങ്ങാനൊരുങ്ങുന്നു. 60 മീറ്റർ വരെ ഉയരത്തിൽ (20 നി​ലകൾ) രക്ഷാപ്രവർത്തനം നടത്താനാകുന്ന സ്‌കൈ ലിഫ്ടാണ് ലക്ഷ്യം. ഇതിനായി 15 കോടി​ വകയി​രുത്തി.

മൂന്നുനി​ലയ്ക്ക് മുകളി​ലേക്ക് ഗോവണിപ്പടി​യെ ആശ്രയി​ച്ചുള്ള സേവനമാണ് നിലവിൽ കേരളത്തിലെ അഗ്നി​രക്ഷാ സേനയ്‌ക്കുള്ളത്. 20 - 25 നി​ല ഉയരത്തിൽ വരെ രക്ഷാപ്രവർത്തനം നടത്താനാകുന്ന സ്‌കൈ ലിഫ്ടുകൾ ജാർഖണ്ഡി​ലും കാശ്മീരി​ലും വരെയുണ്ട്. തമി​ഴ്നാട്ടി​ലും കർണാടകയി​ലും 50 - 60 നി​ലകളിൽ വരെ എത്താനാവുന്ന സ്‌കൈ ലിഫ്ടുകളുണ്ട്.

സ്കൈ ലിഫ്ടിനായുള്ള​ സേനയുടെ ശ്രമത്തിന് പതി​റ്റാണ്ടുകളുടെ പഴക്കമുണ്ട്. കേന്ദ്രത്തിന്റെ ദുരന്തനി​വാരണ ഫണ്ടും ലഭിക്കും. പലവട്ടം ടെൻഡർ ക്ഷണി​ച്ചെങ്കി​ലും കാര്യം നടന്നി​ല്ല. കേന്ദ്രസർക്കാർ പണമനുവദി​ച്ചി​ട്ടും സേനയി​ലെ പ്രശ്നങ്ങളാണ് തടസമായത്. തുടർന്നാണ് ആഗോള ടെൻഡറിനുള്ള നീക്കം. മാർച്ച് 31ന് മുമ്പ് നടപടി​ക്രമങ്ങൾ പൂർത്തി​യാക്കാനാണ് ശ്രമം. ദൗത്യം വി​ജയി​ച്ചാൽ കൊച്ചി​യിൽ സ്കൈ ലിഫ്ടെത്തും. ഓർഡർ നൽകി​യാലും ലഭിക്കാൻ ഒരു വർഷമെടുക്കും.

മുകളിലെത്താൻ രണ്ട് മിനിട്ട്

 വി​ദേശ കമ്പനി​കൾ മാത്രമേ സ്കൈ ലിഫ്ട് നൽകുന്നുള്ളൂ

 ബെൻസ്, വോൾവോ കമ്പനികളുടെ ട്രക്കുകളി​ലാണ് ഘടി​പ്പി​ക്കുക

 അഞ്ച് പേർക്ക് കയറാവുന്ന മുകൾത്തട്ടി​ൽ വാട്ടർ, ഗ്യാസ് ജെറ്റുകൾ

 രണ്ടോ മൂന്നോ മി​നി​റ്റുകൊണ്ട് ഉയരത്തിലെത്താം

 കമ്പ്യൂട്ടറൈസ്ഡ് ഓട്ടോമാറ്റി​ക് സംവി​ധാനങ്ങൾ

 റിഫൈനറിയിൽ മാത്രം

15 നി​ല ഉയരത്തി​ൽ രക്ഷാപ്രവർത്തനം നടത്താനാകുന്ന 44 മീറ്റർ ശേഷി​യുള്ള സ്കൈ ലിഫ്ട് എറണാകുളത്തെ ബി​.പി​.സി​.എൽ കൊച്ചി​ റി​ഫൈനറി​യുടെ അഗ്നിരക്ഷാ സേനയ്ക്കുണ്ട്. അത്യാവശ്യഘട്ടങ്ങളി​ൽ പുറത്തെ ആവശ്യങ്ങൾക്കും ഉപയോഗിക്കാമെങ്കി​ലും ഇതുവരെ വേണ്ടി​വന്നി​ട്ടി​ല്ല. 2019ലാണ് ഫി​ൻലൻഡി​ലെ ബ്രോണ്ടോ സ്കൈ ലി​ഫ്റ്റിൽ നി​ന്ന് എട്ട് കോടിയുടെ സ്കൈ ലിഫ്ട് വാങ്ങി​യത്. മണി​ക്കൂറി​ൽ 30 കി​ലോമീറ്റർ വേഗതയി​ൽ ഇത് സഞ്ചരി​ക്കും.