പറവൂർ: മയക്കുമരുന്ന് കടത്ത് കേസിൽ കോതമംഗലം തങ്കളം ജവഹർ കോളനിയിൽ കാരോട്ട് പുത്തൻപുരയ്ക്കൽ വീട്ടിൽ മുഹമ്മദ് മുനീർ (27), മാറംപിള്ളി പള്ളിപ്രം പത്തനായത്ത് വീട്ടിൽ അർഷാദ് (35) എന്നിവർക്ക് പത്ത് വർഷം കഠിനതടവും ഒരുലക്ഷം രൂപ പിഴയും പറവൂർ അഡിഷണൽ സെഷൻസ് കോടതി ശിക്ഷ വിധിച്ചു. ആന്ധ്രപ്രദേശിൽ നിന്ന് 30.200 കിലോ കഞ്ചാവ് സ്വകാര്യ കൊറിയർ സർവീസ് വഴി കേരളത്തിലേക്ക് കടത്തിയെന്നാണ് കേസ്. 2021 ഒക്ടോബറിൽ പെരുമ്പാവൂർ കുന്നുവഴിയിലെ കൊറിയർ സർവീസിന് സമീപം അന്തർസംസ്ഥാന കഞ്ചാവ്സംഘമുണ്ടെന്ന് രഹസ്യവിവരത്തെ തുടർന്ന് നടത്തിയ പരിശോധനയിൽ പ്രതികൾ പിടിയിലാവുകയായിരുന്നു. പെരുമ്പാവൂർ പൊലീസ് സബ്ഇൻസ്പെക്ടർ ജോസി എം. ജോൺസനാണ് പ്രതികളെ അറസ്റ്റ് ചെയ്തത്. തുടരന്വേഷണം നടത്തി കുറ്റപത്രം സമർപ്പിച്ചത് ഇൻസ്പെക്ടർ ആർ. രഞ്ജിത്താണ്. പ്രൊസിക്യൂഷന് വേണ്ടി അഡിഷണൽ പബ്ലിക്ക് പ്രൊസിക്യൂട്ടർമാരായ ശ്രീറാം ഭരതൻ, എൻ.കെ. ഹരി എന്നിവർ ഹാജരായി.