കൊച്ചി: ഇന്ത്യൻ സംസ്‌കാരത്തിന്റെ ബഹുസ്വരതയെ സംരക്ഷിക്കേണ്ടത് യുവജനങ്ങളുടെ കർത്തവ്യമാണെന്ന് ബൃന്ദ കാരാട്ട് പറഞ്ഞു. ശ്രീശങ്കരാചാര്യ സംസ്‌കൃത സർവകലാശാലയിലെ സംസ്‌കൃത സാഹിത്യവിഭാഗം സംഘടിപ്പിച്ച രണ്ടാമത് പ്രൊഫസർ ധർമ്മരാജ് അടാട്ട് എൻഡോവ്‌മെന്റ് പ്രഭാഷണം നിർവഹിക്കുകയായിരുന്നു അവർ. സംസ്‌കാരവും സമത്വവും വർത്തമാനകാല ഇന്ത്യൻ സാഹചര്യത്തിൽ എന്ന വിഷയത്തിലായിരുന്നു പ്രഭാഷണം.
സംസ്‌കാരമെന്നത് നിരന്തരം മാറ്റങ്ങൾക്ക് വിധേയമാകുന്ന ഒന്നാണ്. മനുഷ്യനെ കേവലം ഉപഭോക്താവായി മാറ്റുന്ന സംസ്‌കാരമാണ് നിലവിൽ വളർന്നുകൊണ്ടിരിക്കുന്നത്. ഭരണഘടനയ്ക്ക് വിരുദ്ധമായ മനുസ്മൃതിയുടെ ആശയങ്ങളാണ് സമകാലിക ഇന്ത്യൻ സാഹചര്യത്തിൽ ഉയർന്നുവരുന്നത്. ഇതിനെ ചെറുക്കേണ്ടത് യുവജനതയുടെ കർത്തവ്യമാണെന്നും ബൃന്ദ കാരാട്ട് പറഞ്ഞു. സംസ്‌കൃതസാഹിത്യ വിഭാഗം തലവൻ പ്രൊഫ. കെ.വി. അജിത്കുമാർ അദ്ധ്യക്ഷത വഹിച്ചു. ഡോ. ധർമ്മരാജ് അടാട്ട് രചിച്ച നാല് പുസ്തകങ്ങളും പ്രകാശിപ്പിച്ചു.
ഡോ. ധർമ്മരാജ് അടാട്ട്, ഡോ. ടി. മിനി, ഡോ. സത്യൻ മലയിൽ, അഡ്വ. തുളസി, ഡോ. കെ.എൽ. പത്മദാസ് എന്നിവർ സംസാരിച്ചു.