കൊച്ചി: റോഡ് ഷോ കടന്നുപോകുന്ന ലാ കോളേജിന് മുന്നിൽ പ്രധാനമന്ത്രി നരേന്ദ്രമോദിക്കെതിരെ പ്രതിഷേധ ബാനർ ഉയർത്തിയതിന് രണ്ട് കെ.എസ്.യു നേതാക്കളെ പൊലീസ് കസ്റ്റഡിയിലെടുത്തു. കോളേജ് യൂണിറ്റ് പ്രസിഡന്റ് കെ.കെ. മുഹമ്മദ് അജ്മൽ, ജനറൽ സെക്രട്ടറി ആരോൺ കുര്യൻ ജോൺ എന്നിവരെയാണ് എറണാകുളം സെൻട്രൽ പൊലീസ് കസ്റ്റഡിയിലെടുത്തത്. രാവിലെ നീക്കംചെയ്ത ബാനർ വൈകിട്ട് വീണ്ടും ഉയർത്തിയപ്പോഴാണ് നടപടി.

എ ബിഗ് നോ ടു മോദി, നോ കോംപ്രമൈസ്','സേവ് ലക്ഷദ്വീപ്' എന്നെഴുതിയ ബാനർ രാവിലെ സ്‌പെഷ്യൽ പ്രൊട്ടക്ഷൻ ഗ്രൂപ്പ് (എസ്.പി.ജി) ഉദ്യോഗസ്ഥരും പൊലീസും ചേർന്ന് അഴിച്ചുമാറ്റിയിരുന്നു. പ്രശ്‌നം രമ്യമായി പരിഹരിച്ചെങ്കിലും വൈകിട്ട് കെ.എസ്.യു പ്രവർത്തകർ രണ്ടാമതും ബാനർ ഉയർത്തി പ്രതിഷേധിച്ചു. ഈ ബാനറും പൊലീസ് അഴിച്ചുമാറ്റി. കെ.എസ്.യുവിനെതിരെ പ്രതിഷേധവുമായി ബി.ജെ.പി പ്രവർത്തകരും ലാ കോളേജിന്റെ മുന്നിലേക്ക് എത്തിയതോടെ ഏറെ പണിപ്പെട്ടാണ് പൊലീസ് സംഘർഷ സാദ്ധ്യത ഒഴിവാക്കിയത്.