കൊച്ചി: കാക്കനാട്- പൂക്കാട്ടുപടി- പെരുമ്പാവൂർ റൂട്ടിൽ യാത്രചെയ്യുന്നവർക്ക് ഇനി മലയിടംതുരുത്തിൽ വഴിയോരത്ത് ഒരു വിശ്രമമാകാം.

വാഴക്കുളം ബ്ലോക്ക് പഞ്ചായത്ത് എല്ലാവിധ ആധുനിക സൗകര്യങ്ങളോടും കൂടി നിർമ്മിച്ച 'ടേക്ക് എ ബ്രേക്ക്' പൂർണ സജ്ജം. കോഫി ഷോപ്പ്, ഭിന്നശേഷി സൗഹൃദ ശുചിമുറി, ഫീഡിംഗ് റൂം, സാനിറ്ററി നാപ്കിൻ വെൻഡിംഗ് മെഷീൻ, കഫറ്റേരിയ, ഓപ്പൺ ഡൈനിംഗ് ഹാൾ, മൊബൈൽ ബാറ്ററി റീചാർജ് പോയിന്റ്, പാർക്കിംഗ് തുടങ്ങിയ സൗകര്യങ്ങളും ഒരുക്കിയിട്ടുണ്ട്. യാത്രാ മദ്ധ്യേ വിശ്രമിക്കുന്നതിനും ലഘുഭക്ഷണം കഴിക്കുന്നതിനുമായി നിരവധിപേരാണ് കേന്ദ്രം പ്രയോജനപ്പെടുത്തുന്നത്.

സംസ്ഥാന സർക്കാരിന്റെ നവകേരളം പദ്ധതിയുടെ ഭാഗമായാണ് ഹരിത കേരള മിഷന്റെയും ശുചിത്വമിഷന്റെയും നേതൃത്വത്തിൽ തദ്ദേശ സ്ഥാപനങ്ങൾക്ക് കീഴിൽ 'ടേക്ക് എ ബ്രേക്ക് പദ്ധതി' ആവിഷ്‌കരിച്ചത്. ദേശീയ സംസ്ഥാന പാതയോരങ്ങൾ, ബസ് സ്റ്റേഷനുകൾ, ഷോപ്പിംഗ് കോംപ്ലക്‌സുകൾ തുടങ്ങിയ സ്ഥലങ്ങളിൽ, സ്ത്രീകൾക്കും കുട്ടികൾക്കുമുൾപ്പെടെ ഏതു സമയത്തും വിശ്രമിക്കാനുള്ള സൗകര്യവും വൃത്തിയും സുരക്ഷിതവുമായ ശുചിമുറികളും കോഫി ഷോപ്പുകളും ലഭ്യമാക്കുക എന്നതാണ് ഉദ്ദേശ്യം.

മലയിടംതുരുത്ത് ടേക്ക് എ ബ്രേക്ക് സമുച്ചയത്തിൽ സാനിട്ടറി നാപ്കിൻ ഡിസ്‌ട്രോയർ, അജൈവ മാലിന്യ സംഭരണ സംവിധാനങ്ങൾ, അണുനാശിനി തുടങ്ങിയ സൗകര്യങ്ങളും ഒരുക്കിയിട്ടുണ്ട്. നടത്തിപ്പ് ചുമതല കുടുംബശ്രീക്കാണ് .

 ചെലവ് 41.5 ലക്ഷം

വാഴക്കുളം ബ്ലോക്ക് പഞ്ചായത്തിന്റെ 2022- 23 സാമ്പത്തിക വാർഷിക പദ്ധതിയിൽ ഉൾപ്പെടുത്തി 41.5 ലക്ഷം രൂപ ചെലവിലാണ് വിശ്രമസങ്കേതം ഒരുക്കിയത്.

 ''ഓപ്പൺ ജിംനേഷ്യം, കുട്ടികൾക്കു കളിസ്ഥലം, മിനി മാസ്റ്റ് ലൈറ്റ്, സി.സി.ടി.വി എന്നീ സൗകര്യങ്ങൾ കൂടി ടേക്ക് എ ബ്രേക്ക് സമുച്ചയത്തിൽ ഏർപ്പെടുത്തും''

കെ.എം. അൻവർ അലി

ബ്ലോക്ക് പഞ്ചായത്ത് പ്രസിഡന്റ്