 ഷീ ഹോസ്റ്റലിന് മന്ത്രി തറക്കല്ലിട്ടു

കൊച്ചി: അഞ്ച് നില, 100 ബെഡ്, മൾട്ടിപർപ്പസ് ഹാൾ, ഷീ ലോഡ്ജിന് പിന്നാലെ വമ്പൻ സൗകര്യങ്ങളോടെ സ്ത്രീകൾക്കും പെൺകുട്ടികൾക്കും ചുരുങ്ങിയ ചെലവിൽ താമസസൗകര്യം ഒരുക്കുന്ന ഷീ ഹോസ്റ്റലിന്റെ ആദ്യഘട്ട നിർമ്മാണം തുടങ്ങുന്നു. ജി.സി.ഡി.എയുടെ കടവന്ത്ര മാർക്കറ്റിന് പിൻവശത്ത് 23 സെന്റ് സ്ഥലത്ത് നിർമ്മിക്കുന്ന ഹോസ്റ്റലിന്റെ തറക്കല്ലിടൽ ഉന്നത വിദ്യാഭ്യാസ വകുപ്പ് മന്ത്രി ഡോ. ആർ ബിന്ദു നിർവഹിച്ചു. ഉന്നത വിദ്യാഭ്യാസ മേഖലയിലും തൊഴിൽ മേഖലയിലുമൾപ്പെടെ വിവിധ മേഖലകളിൽ സ്ത്രീകളുടെ പങ്കാളിത്തം വർദ്ധിക്കുകയാണ്. വിവിധ ആവശ്യങ്ങൾക്ക് നഗരത്തിൽ വന്നുപോകുന്ന സ്ത്രീകൾക്ക് താമസ സൗകര്യം ലഭ്യമാക്കുക പ്രധാനമാണ്. ഷീ ഹോസ്റ്റൽ യാത്ഥാർത്ഥ്യമാകുന്നതോടെ ഇത്തരമൊരു പ്രശ്നത്തിന് പരിഹാരമാകുമെന്ന് മന്ത്രി പറഞ്ഞു.

മെട്രോ സ്റ്റേഷനിൽ ജോലിചെയ്യുന്ന ട്രാൻസ്‌ജെൻഡർ സുഹൃത്തുക്കൾക്ക് ഭദ്രമായ താമസസൗകര്യം ഒരുക്കി നൽകുന്നതിനുള്ള പ്രവർത്തനങ്ങൾ ജി.സി.ഡി.എയുടെ നേതൃത്വത്തിൽ നടപ്പിലാക്കണം. സാമൂഹിക നീതി വകുപ്പിന്റെ എല്ലാവിധ പിന്തുണയും നൽകും. അനുയോജ്യമായ വാസസ്ഥലം അവർക്കായി ഒരുക്കണമെന്നും മന്ത്രി പറഞ്ഞു. മെട്രോ സ്റ്റേഷനിൽ ജോലിചെയ്യുന്ന ട്രാൻസ്‌ജെൻഡർ സുഹൃത്തുക്കൾക്ക് അനുയോജ്യമായ താമസസൗകര്യം ഒരുക്കുന്നതിനുള്ള എല്ലാവിധ നടപടികളും സ്വീകരിക്കുമെന്ന് അദ്ധ്യക്ഷത വഹിച്ച് ജി.സി.ഡി.എ ചെയർമാൻ കെ. ചന്ദ്രൻ പിള്ള അറിയിച്ചു.മേയർ അഡ്വ. എം അനിൽകുമാർ, ടി.ജെ. വിനോദ് എം.എൽ.എ, ജി.സി.ഡി.എ എക്‌സിക്യുട്ടീവ് കമ്മിറ്റി അംഗം എ.ബി. സാബു, കൊച്ചി കോർപ്പറേഷൻ കൗൺസിലർമാരായ ബിന്ദു ശിവൻ, ലതിക തുടങ്ങിയവർ പങ്കെടുത്തു.

 7.5 കോടി
• നിർമ്മാണം രണ്ട് ഘട്ടം

• അടുക്കള

• ഡൈനിംഗ് ഹാൾ

• വാർഡൻ റൂം

• അഡ്മിൻ റൂം

• ലിഫ്റ്റ്

• കാർ പാർക്കിംഗ്