അങ്കമാലി: കഴിഞ്ഞ 20 ന് ഭാര്യയെ കൊലപ്പെടുത്തി ഒളിവിൽപ്പോയ ഭർത്താവ് പിടിയിൽ. പാറക്കടവ് പുളിയനം മില്ലുംപടി ഭാഗത്ത് ബാലനെയാണ് (72) അങ്കമാലി പൊലീസ് പിടികൂടിയത്. ഭാര്യ ലളിതയെയാണ് (62) കൊലപ്പെടുത്തിയത്. ബാലനെ ജില്ലാ പൊലീസ് മേധാവി വൈഭവ് സക്സേനയുടെ നേതൃത്വത്തിലുള്ള പ്രത്യേക ടീം ചേർത്തലയിൽനിന്നാണ് പിടികൂടിയത്.

വീടിന്റെ ഹാളിൽവച്ച് കഴുത്തിൽ കയറിട്ട് മുറുക്കിയാണ് കൊലപ്പെടുത്തിയത്. ഭാര്യയോടുളള വിരോധമാണ് കാരണമായിപ്പറയുന്നത്. സംഭവത്തിനുശേഷം പ്രതി വിവിധയിടങ്ങളിൽ ഒളിവിലായിരുന്നു. ഡിവൈ.എസ്.പി എ. പ്രസാദ്, ഇൻസ്പെക്ടർ പി. ലാൽകുമാർ, എസ്.ഐ മാർട്ടിൻ ജോൺ, എ.എസ്.ഐമാരായ രാജേഷ്‌കുമാർ, കെ.പി. വിജു, സീനിയർ സി.പി.ഒമാരായ അജിതാ തിലകൻ, ദിലീപ്കുമാർ, എബി സുരേന്ദ്രൻ തുടങ്ങിയവരാണ് അന്വേഷണ സംഘത്തിലുള്ളത്.