പറവൂർ: പ്രായപൂർത്തിയാകാത്ത പെൺകുട്ടിക്ക് നേരെ കാവടി ഘോഷയാത്രയ്ക്കിടെ ലൈംഗിക അതിക്രമം കാണിച്ച കേസിൽ പുതുവൈപ്പ് കുളങ്ങരവീട്ടിൽ ജസ്റ്റിന് (53) പറവൂർ അതിവേഗ സ്പെഷൽ കോടതി അഞ്ചുവർഷം കഠിനതടവും പതിനായിരം രൂപ പിഴയും ശിക്ഷവിധിച്ചു. പിഴത്തുക അതിജീവിതയ്ക്ക് നൽകും.

2023 ഫെബ്രുവരി 22ന് പുതുവൈപ്പിലാണ് കേസിനാസ്‌പദമായ സംഭവം. ഞാറക്കൽ പൊലീസ് രജിസ്‌റ്റർ ചെയ്‌ത കേസിൽ എസ്.ഐ വന്ദന കൃഷ്ണ‌നാണ് അന്വേഷണം നടത്തി കുറ്റപത്രം സമർപ്പിച്ചത്. പ്രോസിക്യൂഷൻ എട്ട് സാക്ഷികളെ വിസ്‌തരിച്ചു. 13 രേഖകൾ ഹാജരാക്കി. പ്രോസിക്യൂഷനുവേണ്ടി സ്പെഷ്യൽ പബ്ലിക് പ്രോസിക്യൂട്ടർ പ്രവിത ഗിരീഷ്‌കുമാർ, നിവ്യ ജോർജ് എന്നിവർ ഹാജരായി.