കട്ടപ്പന: എസ്.എൻ.ഡി.പി യോഗം മലനാട് യൂണിയന്റെ നേതൃത്വത്തിൽ നടത്തിവരുന്ന വിവാഹപൂർവ്വ കൗൺസിലിംഗ് കോഴ്‌സിന്റെ അടുത്ത ബാച്ച് 6, 7 തീയതികളിൽ കട്ടപ്പന ദൈവദശക ശതാബ്ദി മന്ദിരത്തിൽ (യൂണിയൻ ഓഫീസ്) നടക്കും. 18 വയസ് പൂർത്തിയായ യുവതികൾക്കും 21 വയസ് പൂർത്തിയായ യുവാക്കൾക്കും കോഴ്‌സിൽ പങ്കെടുക്കാം. ആറിന് രാവിലെ ഒമ്പതിന് രജിസ്‌ട്രേഷൻ. 9.30ന് എസ്.എൻ.ഡി.പി യോഗം മലനാട് യൂണിയൻ സെക്രട്ടറി വിനോദ് ഉത്തമന്റെ അദ്ധ്യക്ഷതയിൽ മലനാട് യൂണിയൻ പ്രസിഡന്റ് ബിജു മാധവൻ ഉദ്ഘാടനം ചെയ്യും. എസ്.എൻ.ഡി.പി യോഗം ഇൻസ്‌പെക്ടിംഗ് ഓഫീസർ അഡ്വ. പി.ആർ. മുരളീധരൻ മുഖ്യപ്രഭാഷണം നടത്തും. വൈദിക യോഗം യൂണിയൻ പ്രസിഡന്റ് സോജു ശാന്തികൾ, വനിതാസംഘം യൂണിയൻ പ്രസിഡന്റ് സി.കെ. വത്സ, യൂത്ത്മൂവ്‌മെന്റ് യൂണിയൻ പ്രസിഡന്റ് സുബിഷ് വിജയൻ, സൈബർസേന യൂണിയൻ ചെയർമാൻ അരുൺകുമാർ, കുമാരിസംഘം യൂണിയൻ പ്രസിഡന്റ് കെ.ബി. രേഷ്മ എന്നിവർ സംസാരിക്കും. രാവിലെ 10ന് 'ഗുരുദേവന്റെ ദാമ്പത്യ സങ്കൽപ്പം" എന്ന വിഷയത്തിൽ പച്ചടി എസ്.എൻ എൽ.പി സ്‌കൂൾ ഹെഡ്മാസ്റ്റർ ബിജു പുളിക്കലേടത്തും ഉച്ചകഴിഞ്ഞ് രണ്ടിന് 'നല്ല നാളേക്കുള്ള കരുതൽ" എന്ന വിഷയത്തിലും ക്ലാസ് നടക്കും. ഏഴിന് രാവിലെ ഒമ്പതിന് 'നല്ല വ്യക്തിത്വവും കുടുംബ ജീവിതവും" എന്ന വിഷയത്തിൽ പതിനാറാംകണ്ടം ഗവ. എച്ച്.എസ്.എസിലെ അദ്ധ്യാപകൻ ലെനിൻ പുളിക്കലും 11ന് 'കുടുംബ ഭദ്രത" എന്ന വിഷയത്തിൽ മൂവാറ്റുപുഴ വിദ്യാവനിതാ കോളേജ് പ്രിൻസിപ്പൽ പായിപ്ര ദമനനും ഉച്ചകഴിഞ്ഞ് രണ്ടിന് 'കുടുംബ ജീവിതവും സ്ത്രീ പുരുഷ ലൈംഗീകതയും" എന്ന വിഷയത്തിൽ കട്ടപ്പന സെന്റ് ജോൺസ് ആശുപത്രിയിലെ ഡോ. അനിൽ പ്രദീപും ക്ലാസ് നയിക്കും. വൈകിട്ട് 3.30ന് നടക്കുന്ന സമാപന സമ്മേളനത്തിൽ എസ്.എൻ.ഡി.പി യോഗം ഡയറക്ടർ ബോർഡംഗം ഷാജി പുള്ളോലിൽ അദ്ധ്യക്ഷത വഹിക്കും. സർട്ടിഫിക്കറ്റ് വിതരണോദ്ഘാടനം മലനാട് യൂണിയൻ വൈസ് പ്രസിഡന്റ് വിധു എ. സോമൻ നിർവഹിക്കും. വൈദിക യോഗം യൂണിയൻ സെക്രട്ടറി നിശാന്ത് ശാന്തി, വനിതാസംഘം യൂണിയൻ സെക്രട്ടറി ലതാ സുരേഷ്, യൂത്ത്മൂവ്‌മെന്റ് യൂണിയൻ സെക്രട്ടറി വിഷ്ണു കാവനാൽ, സൈബർസേന യൂണിയൻ കൺവീനർ സനീഷ് പി.എസ്, കുമാരിസംഘം യൂണിയൻ സെക്രട്ടറി ആര്യാമോൾ കമലാസനൻ എന്നിവർ പ്രസംഗിക്കും.