ഇടുക്കി: ജില്ലാ പൊലീസിന്റെ കുറ്റാന്വേഷണ നടപടികൾക്ക് ഗതിവേഗം പകരാൻ ഡോഗ് സ്‌ക്വാഡിലേക്ക് പുതിയ അംഗമെത്തി. തടിയമ്പാട് സെക്വർ ഡോഗ് ട്രെയിനിംഗ് ആന്റ് പെറ്റ് കെയറിന്റെ ഉടമയും ചെറുതോണി സ്വദേശിയുമായ നായപരിശീലകൻ സജി എം. കൃഷ്ണനാണ് ഇടുക്കി പൊലീസ് ഡോഗ് സ്‌ക്വാഡിലേക്ക് നായക്കുട്ടിയെ സൗജന്യമായി സമ്മാനിച്ചത്. ജില്ലാ പൊലീസ് മേധാവി ടി.കെ. വിഷ്ണു പ്രദീപ് പുതിയ അംഗത്തെ സ്വീകരിച്ചു. ആറുമാസം വളർച്ചയെത്തിയ ബെൽജിയൻ മലിനോയിസ് എന്ന വിദേശ ഇനത്തിൽപ്പെട്ടതാണ് നായ്കുട്ടി. ഡോഗ് സ്‌ക്വാഡിലെ പരിശീലകരായ സീനിയർ സിവിൽ പൊലീസ് ഓഫീസർ സുനിൽകുമാർ, സിവിൽ പൊലീസ് ഓഫീസർ രഞ്ചിത് എന്നിവർക്കൊപ്പം ഒമ്പത് മാസത്തെ പരിശീലനത്തിനായി ജെനിയെ തൃശൂർ പൊലീസ് അക്കാദമിലേക്ക് കൊണ്ടുപോയി. മോഷണം, കൊലപാതകം തുടങ്ങിയവ തെളിയിക്കുന്ന ട്രാക്കർ നായയായിട്ടാണ് പരിശീലനം നൽകുക. ഇടുക്കി ഡോഗ് സ്‌ക്വാഡിൽ നിന്ന് കഴിഞ്ഞ ജൂലായിൽ വിരമിച്ച ട്രാക്കർ ഡോഗായ ജെനിയുടെ പേരാണ് നിലവിൽ അനൗദ്യോഗികമായി നായ്ക്കുട്ടിക്ക് നൽകിയിരിക്കുന്നത്. പരിശീലനത്തിനു ശേഷം ഔദ്യോഗികമായി പേരും തസ്തികയും നൽകും. ജില്ലാ പൊലീസ് മേധാവിയുടെ ഓഫീസിൽ നടന്ന ചടങ്ങിൽ എ.എസ്.പി ബി. കൃഷ്ണകുമാർ, അസിസ്റ്റന്റ് കമാണ്ടന്റ് റോയി, ജില്ലാ ചാർജ് ഓഫീസർ ജമാൽ പി.എച്ച്, ഇടുക്കി കെ. 9 സ്‌ക്വാഡ് ഇൻസ്‌പെക്ടർ റോയി തോമസ് തുടങ്ങിയവർ പങ്കെടുത്തു.