തൊടുപുഴ: വെള്ളക്കരത്തിൽനിന്നും ബി. പി. എൽ. വിഭാഗത്തെ പൂർണ്ണമായും ഒഴിവാക്കുന്ന പദ്ധതി കൂടുതൽ സുതാര്യമാക്കി വാട്ടർ അതോറിറ്റി. ബി.പി.എൽ വിഭാ​ഗത്തിലുള്ള ഉപഭോക്താക്കൾക്ക് കുടിവെള്ളം സൗജന്യമായി ലഭിക്കുന്നതിന് ഓൺലൈൻ വഴി അപേക്ഷ പുതുക്കി നൽകാനുള്ള സൗകര്യം വാട്ടർ അതോറിറ്റി ലഭ്യമാക്കി. ഇതിനായി https://kwa.kerala.gov.in/bpl-renewal / എന്ന ലിങ്കിൽ പ്രവേശിച്ച്, ബി.പി.എൽ ഉപഭോക്താക്കൾക്ക് ഫോൺ നമ്പർ, 10 അക്ക റേഷൻ കാർഡ് നമ്പർ, 10 അക്ക ഉപഭോക്തൃ ഐഡി, റേഷൻ കാർഡിൽ ലിസ്റ്റ് ചെയ്തിരിക്കുന്ന ഉപഭോക്താവിന്റെ പേര് എന്നിവ നൽകി ഔദ്യോ​ഗിക വെബ്‌സൈറ്റിൽ റജിസ്റ്റർ ചെയ്യാം.

അപേക്ഷയുടെ സ്ഥിതി വിവരം എസ്. എം. എസ്ആയി ലഭിക്കും. ജനുവരി 31നു മുൻപ് അപേക്ഷ പുതുക്കി നൽകാനാണ് നിർദേശിച്ചിരിക്കുന്നത്. ആനുകൂല്യത്തിനുള്ള അപേക്ഷയ്‌​ക്കൊപ്പം റേഷൻ കാർഡ്, ആധാർ കാർഡ്, അവസാനം ലഭിച്ച ബില്ല്, വില്ലേജ് ഓഫിസിൽ കരം അടച്ച രസീത് എന്നിവയുടെ കോപ്പി കൂടി നൽകേണ്ടതാണ്. പ്രതിമാസ കുടിവെള്ള ഉപഭോ​ഗം 15 കിലോ ലിറ്ററിൽ(15000 ലിറ്റർ) താഴെ ഉപഭോ​ഗമുള്ള ബിപിഎൽ​കാർക്കാണ് സൗജന്യ കുടിവെള്ളം ലഭിക്കുന്നത്.

=അപേക്ഷ നൽകേണ്ട അവസാന ദിവസം: ജനുവരി 31

= ഉപഭോക്താവ് നേരിട്ടോ അക്ഷയകേന്ദ്രങ്ങൾ വഴിയോ വാട്ടർ അതോറിറ്റി സെക്ഷൻ ഓഫീസ് വഴിയോ അപേക്ഷ നൽകാം

=ട്രോൾ ഫ്രീ നമ്പർ1916