ഇടുക്കി:വനിതാ കമ്മിഷൻ ജില്ലാതല പട്ടികവർഗ മേഖല ക്യാമ്പ് ഇന്നും നാളെയും മറയൂരിൽ നടക്കും. ഇന്ന് രാവിലെ 10.30ന് മറയൂർ ഗ്രാമപഞ്ചായത്ത് ഹാളിൽ സംഘടിപ്പിക്കുന്ന ശിൽപശാല വനിതാ കമ്മിഷൻ അദ്ധ്യക്ഷ പി. സതീദേവി ഉദ്ഘാടനം ചെയ്യും.
മറയൂർ ഗ്രാമപഞ്ചായത്ത് പ്രസിഡന്റ് ദീപാ അരുൾ ജ്യോതി അദ്ധ്യക്ഷത വഹിക്കും. ദേവികുളം ബ്ലോക്ക് പഞ്ചായത്ത് പ്രസിഡന്റ് പി. ജയലക്ഷ്മി വിശിഷ്ടാതിഥിയാകും.
വനിതാ കമ്മിഷൻ അംഗങ്ങളായ അഡ്വ. എലിസബത്ത് മാമ്മൻ മത്തായി, അഡ്വ. പി. കുഞ്ഞായിഷ, വി.ആർ. മഹിളാണി, അഡ്വ. ഇന്ദിരാ രവീന്ദ്രൻ, മെമ്പർ സെക്രട്ടറി സോണിയ വാഷിംഗ്ടൺ, ഡയറക്ടർ ഷാജി സുഗുണൻ, മറയൂർ ഗ്രാമപഞ്ചായത്ത് വൈസ് പ്രസിഡന്റ് ജോമോൻ തോമസ്, വികസന സ്ഥിരം സമിതി അദ്ധ്യക്ഷ ഉഷ ഹെന്റി, ക്ഷേമകാര്യ സ്ഥിരം സമിതി അദ്ധ്യക്ഷൻ മണികണ്ഠൻ, ആരോഗ്യ, വിദ്യാഭ്യാസ സ്ഥിരം സമിതി അദ്ധ്യക്ഷ സത്യവതി പളനിസ്വാമി, ബ്ലോക്ക് പഞ്ചായത്ത് മെമ്പർ സി. വിജയ്, ഗ്രാമപഞ്ചായത്ത് മെമ്പർ തങ്കം പരമശിവം, വനിതാ കമ്മിഷൻ പ്രോജക്ട് ഓഫീസർ എൻ. ദിവ്യ, റിസർച്ച് ഓഫീസർ എ.ആർ. അർച്ചന എന്നിവർ സംസാരിക്കും.
പട്ടികവർഗ മേഖലയിൽ സർക്കാർ നടത്തുന്ന പദ്ധതികൾ എന്ന വിഷയം മൂന്നാർ ട്രൈബൽ എക്സ്റ്റൻഷൻ ഓഫീസർ എസ്. സുദീപ് കുമാറും ലഹരിയുടെ വിപത്ത് എന്ന വിഷയം ജനമൈത്രി എക്‌സൈസ് സ്‌ക്വാഡ് പ്രിവന്റീവ് ഓഫീസർ പി.എച്ച്. ഉമ്മറും അവതരിപ്പിക്കും.
നാളെ രാവിലെ 10ന് മറയൂരിലെ പട്ടികവർഗ മേഖലയിൽ വനിതാ കമ്മിഷൻ ഗൃഹസന്ദർശനം നടത്തും. രാവിലെ 11ന് മറയൂർ ഗ്രാമപഞ്ചായത്ത് ഹാളിൽ വിവിധ വകുപ്പുകളെ പങ്കെടുപ്പിച്ച് ഏകോപനയോഗം ചേരും.