തൊടുപുഴ: പഞ്ചാക്ഷരീമന്ത്രത്താൽ മുഖരിതമായ അന്തരീക്ഷത്തിൽ കാഞ്ഞിരമറ്റം ശ്രീ മഹാദേവക്ഷേത്രത്തിൽ പുനഃ പ്രതിഷ്​ഠ ചടങ്ങുകൾ നടന്നു. ഇന്നലെ രാവിലെ അഞ്ചുമണിമുതൽ ആരംഭിച്ച രക്ഷവിടർത്തി പൂജ , പ്രാസാദ പ്രതിഷ്ഠ , വലിയപാണി തുടങ്ങി അതിവിശിഷ്ടമായ ചടങ്ങുകൾക്കുശേഷം ജീവകലശവും മറ്റു കലശങ്ങളും യജ്ഞശാലയിൽ നിന്ന് ശ്രീകോവിലിലേയ്ക്ക് ആചാരപൂർവ്വം എഴുന്നള്ളിച്ചു.തുടർന്ന് പുനഃപ്രതിഷ്​ഠാകർമ്മം നടന്നു. പ്രതിഷ്​ഠാകർമ്മത്തെ തുടർന്ന് കുംഭേശ നിദ്ര , പ്രതിഷ്​ഠാബലി , പ്രതിഷ്​ഠാദക്ഷിണ തുടങ്ങിയ വൈദികകർമ്മങ്ങളും നടന്നു. ചോറ്റാനിക്കര സത്യൻ നാരായണ മാരാരുടെ പ്രമാണത്തിൽ സ്‌​പെഷ്യൽ പഞ്ചവാദ്യവും ക്ഷേത്രത്തിൽ നടന്നു.
വൈകിട്ട് 6.30 ന് മുൻപായി ദീപസ്​ഥാനവും നിയമം നിശ്ചയിച്ച് നടയടക്കൽ ചടങ്ങും നടന്നു. ഇനിയുള്ള രണ്ടു നാളുകൾ ദേവകൾ ശ്രീകോവിലിൽ പൂജ ചെയ്യുന്നുവെന്ന സങ്കൽപ്പത്തിൽ മണ്ഡപത്തിലേക്ക് ദേവചൈതന്യത്തെ ആവാഹിച്ച് വിധിപ്രകാരമുള്ള പൂജകൾ നടത്തപ്പെടും.
രാവിലെ 11 മണിമുതൽ ക്ഷേത്രമൈതാനത്ത് അയോദ്ധ്യയിലെ പ്രാണ പ്രതിഷ്​ഠാച്ചടങ്ങുകളുടെ ബിഗ്‌​സ്​ക്രീൻ ലൈവ് പ്രദർശനവും ക്ഷേത്രത്തിൽ ഒരുക്കിയിരുന്നു.
വൈകിട്ട് വേദിയിൽ പ്രബന്ധചൂഢാമണി പൊതിയിൽ നാരായണ ചാക്യാർ അവതരിപ്പിച്ച ചാക്യാർകൂത്തും പത്മരാഗം ഓർക്കസ്ട്രയുടെ ഗാനമേള യും , ഭീമപർവം എന്ന ബാലെയും അരങ്ങേറി.

ഇന്ന് രാവിലെ 5 മുതൽ മണ്ഡപത്തിൽ വിവിധ പൂജകളും , പരിവാര പ്രതിഷ്​ഠകൾ , മാതൃക്കല്ല് പ്രതിഷ്​ഠ , വലിയ ബലിക്കല്ല് പ്രതിഷ്​ഠ , ഉപദേവതകൾക്ക് കലശം , തുടങ്ങിയ ചടങ്ങുകളും നടക്കും.വൈകിട്ട് വേദിയിൽ തിരുവാതിര , വിളക്ക് ഡാൻസ് , കുച്ചിപ്പുടി എന്നീ നൃത്തപരിപാടികളും കൊച്ചിൻ തരംഗിണിയുടെ ഗാനമേളയും നടക്കും.