ബേക്കൽ : പത്ത് ദിവസമായി ബേക്കൽ ഇന്റർ നാഷണൽ ബീച്ച് ഫെസ്റ്റിവൽ നടന്ന ബേക്കൽ ബീച്ച് , പാർക്ക് , സമീപ പ്രദേശങ്ങൾ എന്നിവിടങ്ങളിൽ നിന്നും മാലിന്യങ്ങൾ നീക്കം ചെയ്‌ത് സംസ്കരിക്കരണത്തിനായി അയച്ചുതുടങ്ങി. നാൽപത്തഞ്ചംഗ ഹരിതകർമ്മസേനയും, ജില്ലാ ടൂറിസം പ്രൊമോഷൻ കൗൺസിലിന് കീഴിലുള്ള 21 ക്ലീൻ സെസ്റ്റിനേഷൻ സ്റ്റാഫും ഗ്രീൻ ഹോസ്‌പിറ്റാലിറ്റി മാനേജ്മെന്റ് സർവ്വീസസിലെ 22 പേരുമാണ് ഖരമാലിന്യങ്ങൾ ശേഖരിച്ചത് .

ഇത്തരത്തിൽ 2700 കിലോഗ്രാം മാലിന്യമാണ് നീക്കം ചെയ്യുന്നത്. പള്ളിക്കര പഞ്ചായത്തിനു കീഴിൽ വരുന്ന ബ്ലോക്ക് എം.സി എഫിൽ മാലിന്യം ശേഖരിച്ച് ശാസ്ത്രിയമായി തരം തിരിക്കുന്നതിനും ബണ്ടിൽ ചെയ്യുന്നതിനും ഉപയോഗപ്പെടുത്താൻ ധാരണയായിരുന്നു. മാലിന്യങ്ങൾ തരം തിരിച്ച് മഹ്യൂബ വേസ്റ്റ് മാനേജ്മെന്റിന്റെ ഗോഡൗണിലേക്കാണ് കൊണ്ടുപോകുന്നത്. 2009 ൽ പ്രവർത്തനമാരംഭിച്ച വേസ്റ്റ് മാനേജ്‌മെന്റ് സംരംഭം സ്റ്റാർട്ടപ്പ് കമ്പനിയായി രജിസ്റ്റർ ചെയ്ത്‌ കേരളത്തിലെ ഖരമാലിന്യ സംസ്കരണവും ഇ.പി.ആർ സേവനവും നൽകുന്ന സ്ഥാപനമാണ്.