പയ്യന്നൂർ: തറക്കല്ലിടൽ ചടങ്ങിൽ ആറ് മാസം കൊണ്ട് പൂർത്തിയാക്കുമെന്ന് മന്ത്രി പറഞ്ഞ തീയേറ്റർ സമുച്ചയം 36 മാസം പിന്നിട്ടിട്ടും പൂർത്തിയായില്ലെന്ന് മാത്രമല്ല, നിർമ്മാണ ജോലികൾ നിർത്തിവെക്കുകയും ചെയ്തു. കേരള സംസ്ഥാന ചലച്ചിത്ര വികസന കോർപ്പറേഷൻ പയ്യന്നൂരിൽ നിർമ്മിക്കുന്ന തീയേറ്റർ സമുച്ചയത്തിന്റെ നിർമ്മാണ ജോലികളാണ് കിഫ്ബിയിൽ നിന്ന് ഫണ്ട് ലഭിക്കാത്തതിനെ തുടർന്ന് പാതിവഴിയിലായത്.
തീയേറ്ററിന്റെ 85 ശതമാനം ജോലികളും പൂർത്തീകരിച്ചതായി കെ.എസ്.എഫ്.ഡി.സി ഡയറക്ടർ മനോജ് കാന പറഞ്ഞു. ഇന്റീരിയർ ജോലികളാണ് ഇനി പൂർത്തീകരിക്കാൻ ബാക്കിയുള്ളത്. 2020 ഒക്ടോബർ 28 നാണ് അന്നത്തെ സാംസ്‌ക്കാരികമന്ത്രി എ.കെ.ബാലൻ തീയേറ്ററിന് തറക്കല്ലിട്ടത്. 6 മാസം കൊണ്ട് പണി പൂർത്തീകരിക്കുമെന്ന് മന്ത്രി അന്ന് വ്യക്തമാക്കിയിരുന്നു. തുടക്കത്തിൽ വേഗത്തിൽ നടന്ന നിർമ്മാണ പ്രവൃത്തികൾ കഴിഞ്ഞ 8 മാസത്തോളമായി നിർത്തിവെച്ചിരിക്കുകയാണ്.
13.14 കോടി രൂപയാണ് നിർമ്മാണച്ചെലവ് കണക്കാക്കിയിരുന്നെതെങ്കിലും പണി നീണ്ടുപോകുകയും കിഫ്ബിയിൽ നിന്ന് ഫണ്ട് ലഭിക്കാതിരിക്കുകയും ചെയ്തതോടെയാണ് പണി മുടങ്ങി. നിർമ്മാണച്ചെലവ് ഇനിയും കോടികൾ കടക്കുമെന്നാണ് ബന്ധപ്പെട്ടവർ പറയുന്നത്. എന്തുതന്നെയായാലും 2024 ൽ തീയേറ്ററിന്റെ പണി പൂർത്തീകരിച്ച് ഉദ്ഘാടനം നടത്തുമെന്ന് കെ.എസ്.എഫ്.ഡി.സി ഡയറക്ടറും ചലച്ചിത്ര സംവിധായകനുമായ മനോജ് കാന പറയുന്നു. നീലേശ്വരത്തും ആന്തൂർ നഗരസഭയിലെ ധർമ്മശാലയിലും പുതിയ തീയേറ്ററുകൾ ആരംഭിക്കാനുള്ള ശ്രമങ്ങൾ കെ.എസ്.എഫ്.ഡി.സി ആരംഭിച്ചിട്ടുണ്ട്. പയ്യന്നൂരിനോടൊപ്പം ഏറ്റെടുത്ത പരിയാരത്തെ ഒരേക്കറോളം വരുന്ന സ്ഥലത്ത് ഇതുവരെ തീയേറ്ററിന്റെ നിർമ്മാണ പ്രവൃത്തികൾ തുടങ്ങിയിട്ടില്ല.
100ൽ ഒന്ന്
സംസ്ഥാനത്തിന്റെ വിവിധ പ്രദേശങ്ങളിൽ 100 സ്‌ക്രീനുകൾ ഒരുക്കുന്നതിന്റെ ഭാഗമായിട്ടാണ് പയ്യന്നൂരിൽ പുതിയ തീയേറ്റർ നിർമ്മിക്കാൻ തീരുമാനിച്ചത്. പയ്യന്നൂർ നഗരസഭ പാട്ടത്തിന് വിട്ടുനൽകിയ 70 സെന്റ് സ്ഥലത്താണ് സംസ്ഥാന സർക്കാരിന്റെ കിഫ്ബി പദ്ധതിയിൽ ഉൾപ്പെടുത്തി തീയേറ്റർ സമുച്ചയം പണിയുന്നത്.
309 ഇരിപ്പിടങ്ങളും രണ്ട് സ്ക്രീനുകളും
തീയേറ്ററിൽ രണ്ട് സ്ക്രീനുകളും 309 സീറ്റുകളും ഉണ്ടാകും. 4കെ ത്രീഡി ഡിജിറ്റൽ പ്രൊജക്ഷൻ, മേന്മയേറിയ ഡോൾബി അറ്റ്‌മോസ് ശബ്ദ സംവിധാനം, ജെ.ബി.എൽ സ്പീക്കർ, സിൽവർ സ്‌ക്രീൻ, ഇൻവെർട്ടർ ടൈപ്പ് ശീതീകരണ സംവിധാനം, നിരീക്ഷണ കാമറകൾ, ആധുനിക ജനറേറ്ററുകൾ, ഫയർ ഫൈറ്റിംഗ് സംവിധാനം, ആധുനിക ത്രീഡി സംവിധാനം, സൗകര്യപ്രദമായ സോഫാ പുഷ്ബാക്ക് ഇരിപ്പിടങ്ങൾ, എൽ.ഇ.ഡി ഡിസ്‌പ്ലേ, ആധുനിക ടോയ്ലറ്റ് സൗകര്യം, ലിഫ്റ്റ് സൗകര്യം, ക്യാന്റീൻ, ആവശ്യമായ പാർക്കിംഗ് സൗകര്യം തുടങ്ങിയവയാണ് പുതിയ തീയേറ്റർ സമുച്ചയത്തിൽ ഏർപ്പെടുത്തുന്നത്.