തളിപ്പറമ്പ്: സിനിമ എടുക്കുക എന്നത് എളുപ്പമാണെങ്കിലും, വളരെ നല്ല സിനിമകൾ ചെയ്യുക എന്നത് അത്ഭുതമാണെന്ന് തെന്നിന്ത്യൻ നടിയും സംവിധായികയുമായ സുഹാസിനി മണിരത്നം പറഞ്ഞു. ഹാപ്പിനസ് ഫെസ്റ്റിവലിന്റെ ഭാഗമായി സംസ്ഥാന ചലച്ചിത്ര അക്കാഡമിയുടെ നേതൃത്വത്തിൽ തളിപ്പറമ്പിൽ ആരംഭിച്ച രണ്ടാമത് അന്താരാഷ്ട്ര ചലച്ചിത്രമേള ഉദ്ഘാടനം ചെയ്യുകയായിരുന്നു അവർ.
സിനിമയിലെ അത്ഭുതം കാണാനാണ് പ്രേക്ഷകർ കാത്തിരിക്കുന്നത്. നാം നമ്മെ തന്നെ കാണുന്ന കണ്ണാടിയാണ് സിനിമ. യാഥാർത്ഥ്യ ബോധമുള്ള കഥകൾ ജനിക്കുമ്പോഴാണ് അത് സാധ്യമാകുക. തങ്ങളുടെ ചെറുപ്പകാലത്ത് നല്ല സിനിമകൾ എവിടെ കാണുമെന്ന് പറഞ്ഞ് തരാൻ ആരുമുണ്ടായിരുന്നില്ല. അതിനുള്ള ഉത്തരമാണ് ചലച്ചിത്ര മേളകൾ. ബുദ്ധന് ബോധി വൃക്ഷം ലഭിച്ചത് പോലെയാണ് കലാകാരൻമാർക്ക് ഇത്തരം മേളകൾ. അറിവ് സാംശീകരിച്ചു കൊണ്ടേയിരിക്കാം. വർഷങ്ങളായി ഈ മേഖലയിലുള്ള താൻ ഇന്നും ഒരു വിദ്യാർത്ഥിയാണ്. ഫിലിം ഇൻസ്റ്റിറ്റ്യൂട്ടിൽ പഠിച്ചിട്ടുണ്ടോ എന്ന് ആരെങ്കിലും ചോദിച്ചാൽ ഇല്ല എന്നാണ് ഉത്തരം. ഇതുവരെ കണ്ട സിനിമകളിൽ നിന്നും കൂടുതൽ കാര്യങ്ങൾ പഠിക്കാനായി. തെന്നിന്ത്യയിൽ മലയാള സിനിമ തികച്ചും വ്യത്യസ്തമാണ്. കഥയിലെ യാഥാർത്ഥ്യ ബോധമാണ് മലയാളത്തിന്റെ സ്വീകാര്യത വർദ്ധിപ്പിക്കുന്നത്. ഹാപ്പിനസിനായി തളിപ്പറമ്പിൽ മേള സംഘടിപ്പിച്ചത് മാതൃകാപരമാണെന്നും സുഹാസിനി പറഞ്ഞു.
ക്ലാസിക് തിയേറ്ററിൽ നടന്ന ചടങ്ങിൽ എം.വി ഗോവിന്ദൻ മാസ്റ്റർ എം.എൽ.എ അധ്യക്ഷത വഹിച്ചു. ആന്തൂർ നഗരസഭ ചെയർമാൻ പി. മുകുന്ദൻ ഫെസ്റ്റിവെൽ ബുക്ക് നടൻ സന്തോഷ് കീഴാറ്റൂരിന് നൽകി പ്രകാശനം ചെയ്തു. സംഘാടക സമിതി ചെയർമാൻ കല്ലിങ്കീൽ പത്മനാഭൻ ഫെസ്റ്റിവെൽ ബുള്ളറ്റിൻ ചലച്ചിത്ര അക്കാഡമി ജനറൽ കൗൺസിൽ അംഗം കുക്കു പരമേശ്വരന് നൽകി പ്രകാശനം ചെയ്തു. ചലച്ചിത്ര അക്കാഡമി സെക്രട്ടറി സി. അജോയ്, വിസ്മയ പാർക്ക് വൈസ് ചെയർമാൻ കെ. സന്തോഷ്, സംവിധായകരും ചലച്ചിത്ര അക്കാഡമി ജനറൽ കൗൺസിൽ അംഗങ്ങളുമായ മനോജ് കാന, പ്രദീപ് ചൊക്ലി, സംവിധായകനും സംഘാടക സമിതി കൺവീനറുമായ ഷെറി ഗോവിന്ദ് തുടങ്ങിയവർ പങ്കെടുത്തു.
31 സിനിമകൾ
മൂന്ന് ദിവസങ്ങളിലായി ക്ലാസിക്, ക്ലാസിക് ക്രൗൺ, ആലിങ്കീൽ പാരഡൈസ് എന്നീ മൂന്നു തിയേറ്ററുകളിലായി നടക്കുന്ന മേളയിൽ 31 സിനിമകൾ പ്രദർശിപ്പിക്കും. ഉദ്ഘാടന ചിത്രമായി കെൻ ലോച്ചിന്റെ 'ദ ഓൾഡ് ഓക്ക്' പ്രേക്ഷകർക്ക് മുന്നിലെത്തി. 28-ാമത് ഐ.എഫ്.എഫ്.കെയിൽ പ്രേക്ഷകപ്രീതി നേടിയ ചിത്രങ്ങളാണ് മേളയിലുള്ളത്. നവതി നിറവിലെത്തിയ എം.ടിക്കും നടൻ മധുവിനും ആദരവായി 'എം.ടി, മധു @90' എന്ന എക്സിബിഷൻ തളിപ്പറമ്പ് ടൗൺ സ്‌ക്വയറിൽ ആരംഭിച്ചിട്ടുണ്ട്.