കോഴിക്കോട്: തെരുവോരങ്ങളിൽ ഒറ്റപ്പെട്ടുപോയവരെ പുനരധിവസിപ്പിക്കുന്ന ജില്ലാ ഭരണകൂടത്തിന്റെ 'ഉദയം' പദ്ധതിയുടെ ധനസമാഹരണത്തിനായി നാടൊരുമിക്കുന്നു.

ജില്ലയിലെ വിവിധ വിദ്യാഭ്യാസ സ്ഥാപനങ്ങളിൽ നിന്നുള്ള വിദ്യാർത്ഥികളും ഉദയം പദ്ധതിയിലെ പ്രവർത്തകരും ചേർന്നാണ് 31 ന് ധനസമാഹരണ ക്യാമ്പയിൻ സംഘടിപ്പിക്കുന്നത്. ധന സമാഹരണവുമായി ബന്ധപ്പെട്ട് ജില്ലാ കളക്ടർ സ്‌നേഹിൽ കുമാർ സിംഗിന്റെ അദ്ധ്യക്ഷതയിൽ യോഗം ചേർന്നു. ജില്ലയിലെ ഐ.ടി.ഐ, പോളിടെക്നിക്, എൻജിനീയറിംഗ് കോളേജുകളിലെ പ്രതിനിധികളെ ഉൾപ്പെടുത്തിയാണ് യോഗം ചേർന്നത്. തെരുവിൽ ഉപേക്ഷിക്കപ്പെട്ടവരുടെ പുനരധിവാസത്തിന് 2020 ൽ ജില്ലാ ഭരണകൂടത്തിന്റെ നേതൃത്വത്തിൽ ആരംഭിച്ച പദ്ധതിയാണ് ഉദയം. രണ്ടായിരത്തോളം പേരെ ഇതുവരെ പദ്ധതിയുടെ ഭാഗമായി പുനരധിവസിപ്പിച്ചു. വെള്ളിമാടുകുന്ന്, ചേവായൂർ, വെസ്റ്റ്ഹിൽ എന്നിവിടങ്ങളിലായാണ് ഉദയം ഹോം പ്രവർത്തിക്കുന്നത്.