@ നിയമം കർശനമാക്കി ഭക്ഷ്യ സുരക്ഷാ വകുപ്പ്

കോഴിക്കോട് : പാർസൽ ഭക്ഷണത്തിൽ ലേബൽ പതിച്ചില്ലെങ്കിൽ ഇനി കനത്ത പണി കിട്ടും. ലേബൽ പതിക്കൽ കർശനമാക്കി ഭക്ഷ്യ സുരക്ഷാ വകുപ്പ്. ഭക്ഷണം തയ്യാറാക്കിയ സമയം ഉൾപ്പെടെ പ്രദർശിപ്പിക്കണമെന്നാണ് നിർദ്ദേശം. ഇതിന്റെ ഭാഗമായി സംസ്ഥാനത്ത് ഇന്ന് ഭക്ഷ്യ സുരക്ഷാ വകുപ്പിന്റെ നേതൃത്വത്തിൽ സ്പെഷ്യൽ ഡ്രൈവ് നടത്തും. 40 സ്ക്വാഡുകളായാണ് പരിശോധന.

ജില്ലയിൽ 5 സ്ക്വാഡുകളുണ്ടാവും. ലേബലിൽ ഉപയോഗിക്കേണ്ട സമയ പരിധി കൃത്യമായി രേഖപ്പെടുത്തണം. കടകളിൽ നിന്ന് വിൽക്കുന്ന പാകം ചെയ്ത പാർസൽ ഭക്ഷണത്തിൽ ലേബൽ നിർബന്ധമാണെങ്കിലും കടയുടമകൾ പാലിക്കുന്നില്ലെന്ന് കണ്ടെത്തിയതിനെ തുടർന്നാണ് നിയമം കർശനമാക്കാൻ ഭക്ഷ്യ സുരക്ഷാ കമ്മിഷണർ നിർദ്ദേശം നൽകിയിരിക്കുന്നത്.

പാർസൽ ഭക്ഷണം സമയപരിധി കഴിഞ്ഞ് ഉപയോഗിക്കുന്നതുമൂലം ഭക്ഷ്യ വിഷബാധ വർദ്ധിക്കുന്ന സാഹചര്യമാണ്. ഭക്ഷ്യ സുരക്ഷാ ഗുണനിലവാര നിയമപ്രകാരം പാകം ചെയ്ത ഭക്ഷണം രണ്ട് മണിക്കൂറിനകം ഉപയോഗിക്കണം എന്നാണ്. നിലവിൽ പായ്ക്കറ്റുകളിൽ വിൽപ്പന നടത്തുന്ന ഭക്ഷണത്തിൽ ലേബൽ നിർബന്ധമാണ്. എന്നാൽ കടകളിൽ നിന്ന് വാങ്ങുന്ന പാർസലുകളിൽ ഭക്ഷണം തയ്യാറാക്കിയ സമയത്തെ സംബന്ധിച്ചോ ഉപയോഗിക്കേണ്ട സമയ പരിധിയെക്കുറിച്ചോ ഉപഭോക്താക്കൾക്ക് അറിയാൽ സംവിധാനമില്ല. പലരും പാർസൽ ഭക്ഷണം വാങ്ങി സമയം നോക്കാതെ സൗകര്യത്തിന് കഴിക്കുകയാണ്. ഷവർമ പോലുള്ള ഭക്ഷണം സമയപരിധി കഴിഞ്ഞ് ഉപയോഗിക്കുന്നത് അപകടം വരുത്തും. കടകളിൽ നിന്ന് പാർസലായി നൽകുന്ന ഊൺ, സ്നാക്സ്, മറ്റ് ഭക്ഷണങ്ങൾ എന്നിവയ്ക്കെല്ലാം നിയമം ബാധകമാണ്. ഓൺലൈൻ വഴി വിപണനം നടത്തുന്ന ഭക്ഷണ പായ്ക്കറ്റുകളിലും ലേബൽ പതിക്കണം. ലേബൽ പതിക്കാതെ പാർസൽ ഭക്ഷണം വിൽക്കുന്നതിന് നിലവിൽ നിരോധനമുണ്ട്.

'ലേബലുകൾ പാർസൽ ഭക്ഷണ കവറിന് പുറത്ത് നിർബന്ധമായും പതിക്കണം'. ജാഫർ മാലിക്, സംസ്ഥാന ഭക്ഷ്യ സുരക്ഷാ കമ്മിഷണർ.

''ഇതുവരെ നോട്ടീസ് നൽകുകയും പിഴ ഈടാക്കുകയുമാണ് ചെയ്തിരുന്നത്. ഇനി മുതൽ
നിയമം ലംഘിക്കുന്നവർക്കെതിരെ കർശന നടപടി സ്വീകരിക്കും. പഴകിയ ഭക്ഷണവും ആരോഗ്യത്തിന് ഹാനികരമായ ഭക്ഷണവുമടക്കം 350 സാമ്പിളുകളാണ് കഴിഞ്ഞ മാസം പരിശോധനയ്ക്ക് അയച്ചത്. ഇതിൽ 15 എണ്ണത്തിൽ കേസെടുത്തു. അതിന്റെ തുടർ നടപടികൾ നടന്നുവരുന്നു.'' സാക്കിർ ഹുസൈൻ, ഫുഡ്‌ സേഫ്റ്റി ഓഫീസർ, കോഴിക്കോട്.

ലേബലിൽ ഉണ്ടായിക്കണം

ഭക്ഷണം തയ്യാറാക്കിയ സമയം.

ഉപയോഗിക്കേണ്ട സമയ പരിധി.

ലേബർ എവിടെയെല്ലാം

പാർസലായി വിൽപ്പന നടത്തുന്ന ഊൺ, സ്നാക്സ്, മറ്റ് ഭക്ഷണങ്ങൾ എന്നിവയ്ക്കെല്ലാം നിയമം ബാധകം.

ഓൺലൈൻ വഴി വിപണനം നടത്തുന്ന ഭക്ഷണ പായ്ക്കറ്റുകളിലും ലേബൽ പതിക്കണം.