കോഴിക്കോട്: ആകമാന സുറിയാനി ഓർത്തഡോക്‌സ് സഭയുടെ പരമാദ്ധ്യക്ഷൻ മോറാൻ മോർ ഇഗ്നാത്തിയോസ് അഫ്രേം ദ്വിതീയൻ പാത്രിയർക്കീസ് ബാവ ഫെബ്രു. രണ്ടിന് വൈകിട്ട് മൂന്നിന് കോഴിക്കോട് ഭദ്രാസനത്തിന്റെ ആഭിമുഖ്യത്തിൽ നടക്കുന്ന വിശ്വാസ സംഗമത്തിലും വേളംകോട് സെന്റ് മേരീസ് യാക്കോബായ സുറിയാനി സൂനോറോ പള്ളിയുടെ ഡയമണ്ട് ജൂബിലി ആഘോഷ പരിപാടികളിലും പങ്കെടുക്കും. ഡയമണ്ട് ജൂബിലി മെമ്മോറിയൽ ഹാളിന്റെ ശില ആശീർവാദവും ലോഗോ-പ്രകാശനവും, കോഴിക്കോട് ഭദ്രാസനത്തിന്റെ വെബ്സൈറ്റ് ഉദ്ഘാടനവും പാത്രിയർക്കീസ് ബാവ നിർവഹിക്കും. പൗരോഹിത്യ സുവർണ ജൂബിലി

ആഘോഷിക്കുന്ന വന്ദ്യ തൊണ്ടലിൽ ഏലിയാസ് കോർ-എപ്പിസ്‌കോപ്പയെ

ആദരിക്കും. മലങ്കര മെത്രാപ്പോലീത്ത ഡോ.ജോസഫ് മോർ ഗ്രിഗോറിയോസ് മെത്രാപ്പോലീത്ത, കോഴിക്കോട് ഭദ്രാസനാധിപൻ പൗലോസ് മോർ ഐറേനിയോസ് മെത്രാപ്പോലീത്ത, പരിശുദ്ധ പാത്രിയർക്കീസ് ബാവയുടെ മലങ്കരകാര്യ സെക്രട്ടറി മർക്കോസ് മോർ ക്രിസ്റ്റഫോറസ് മെത്രാപ്പോലീത്ത, ബാവയുടെ സെക്രട്ടറി മോർ ഔഗേൻ അൽഖുറി മെത്രാപ്പോലീത്ത എന്നിവർ പരിശുദ്ധ ബാവയോടൊപ്പമുണ്ടാകും. പൊതുസമ്മേളനത്തിൽ കോഴിക്കോട്-മലബാർ സി.എസ്.ഐ ബിഷപ്പ് ഡോ.റോയ്‌സ് മനോജ് വിക്ടർ, എം.കെ.രാഘവൻ എം.പി, മേയർ ഡോ.ബീന ഫിലിപ്പ്, ജില്ലാ കളക്‌ടർ സ്നേഹിൽ കുമാർ സിംഗ്, ഭദ്രാസന സെക്രട്ടറി ഫാ.ഫിലിപ്പ് ജോൺ, വൈദിക സെക്രട്ടറി ഫാ.ബിജോയി അറാക്കുടി, സഭാ വർക്കിംഗ് കമ്മിറ്റിയംഗം ബേബി ജേക്കബ് എന്നിവർ സംബന്ധിക്കും.

വാർത്താ സമ്മേളനത്തിൽ പൗലോസ് മോർ ഐറേനിയോസ് മെത്രാപ്പോലീത്ത, ഭദ്രാസന സെക്രട്ടറി ഫാ. ഫിലിപ്പ് ജോൺ, ബേബി ജേക്കബ്, സി.ഇ. ചാക്കുണ്ണി, ഫാ. ബേസിൽ തൊണ്ടലിൽ എന്നിവർ പങ്കെടുത്തു.