കോക്കുന്നേൽ​പ​ടിയെത്തിയാൽ മൂക്കുപൊത്തണം

കറുക​ച്ചാൽ: എന്തൊരു ദുർഗതിയാണ്. ച​ങ്ങ​നാ​ശേരി വാഴൂർ റോഡിലെ കോക്കുന്നേൽ​പ​ടിയെത്തിയാൽ യാത്രക്കാർ സ്വയം ശപിച്ചുപോകും. മാലിന്യം ഒരുവഴി, അതിൽനിന്നുള്ള ദുർഗന്ധം മറുവഴി. കഠിനമാണ് യാത്രയെന്ന് ആരുംപറയും. ച​ങ്ങ​നാ​ശേരി വാഴൂർ റോഡിന്റെ തിരക്കൊഴിഞ്ഞ ഭാഗങ്ങൾ ഡംപിംഗ് യാഡിന് സമാനമാണ്. കോക്കുന്നേൽപടിയിൽ മാത്രമല്ല പന്ത്രണ്ടാംമൈൽ, മൈലാടി, കാഞ്ഞിരപ്പാറ, ഉദയപുരം എന്നിവിടങ്ങളിലെല്ലാം സ്ഥിതി ദയനീയം. രാത്രിയിൽ ചാ​ക്കിൽ​കെ​ട്ടിയും പ്ലാ​സ്റ്റി​ക് ക​വ​റു​ക​ളിലും കെട്ടി​യും മാലിന്യം തള്ളും. ഹോട്ടലുകൾ, തട്ടുകടകൾ, വ്യാപാര സ്ഥാപനങ്ങൾ എന്നിവിടങ്ങളിൽ നിന്നുള്ള മാലിന്യവുമുണ്ട്. ഇവ ചീ​ഞ്ഞളിഞ്ഞാൽ പിന്നെ യാത്രക്കാർ ജീവനുകൊണ്ട് ഓടുന്നത് പതിവ് കാഴ്ചയാണ്.

വൃത്തിയാക്കാതെ രക്ഷയില്ല

റോ​ഡ​രി​കി​ലെ കാടും പ​ടർപ്പും മാ​ലി​ന്യ തള്ളുന്നവർക്ക് സ​ഹാ​യ​മാ​ണ്. കാടുവളർന്ന സ്ഥലങ്ങളിലാണ് പതിവായി മാലിന്യം തള്ളുന്നത്. പ്രദേശ​ത്ത് പൊലീസ് രാത്രികാല പട്രോ​ളിംഗ് നടത്തണമെന്ന് ആവശ്യമുയർന്നിട്ടുണ്ട്. നി​രീ​ക്ഷ​ണ കാ​മറ​കൾ സ്ഥാ​പി​ച്ചാൽ കുറ്റക്കാരെ പിടികൂടാനും കഴിയും.