കോ​ട്ടയം: എട്ടുമുറി കോളനിയി​ലെ അഞ്ച് കുടുംബങ്ങൾക്ക് വീടായി. ജില്ലാ പ​ഞ്ചാ​യത്ത് കുറിച്ചി ഡിവി​ഷ​നി​ലാണ് എട്ടുമുറി കോ​ള​നി സ്ഥി​തി ചെ​യ്യു​ന്നത്. സർ സി.പി രാമസ്വാമി അയ്യർ തിരുവിതാംകൂർ ദിവാൻ ആയിരുന്ന കാലത്ത് നിർമ്മിച്ച ഗോശാലയിൽ ഏഴ് മുറികളാണ് പിന്നീട് ഏഴ് കുടുംബങ്ങൾക്ക് പാർപ്പിടമായി തീർന്ന എട്ടുമുറി കോളനിയായി തീർന്ന​ത്. ഏഴ് ഗുണഭോക്താക്ക​ളിൽ രണ്ട് പേർ വീട് ആവശ്യമില്ലായെന്ന് രേഖാമൂലം എഴുതി നൽകിയിരുന്നു. 100 വർഷത്തിനുമേൽ പഴക്കമുള്ള കെട്ടിടങ്ങൾ പൊളിച്ച് മാറ്റിയാ​ണ് പുതിയ വീടുകൾ നിർമ്മിച്ച​ത്. ആദ്യം സാങ്കേതിക അനുമതി നിഷേധിച്ച പ്രോജക്ട് പിന്നീട് സെൻട്രൽ കമ്മിറ്റിയുടെ അംഗീകാരം നേ​ടിയെടുക്കുകയായിരു​ന്നു.
ജില്ലാ പഞ്ചായത്തംഗം പി.കെ വൈശാഖ് ഡിവിഷൻ ഫണ്ടിൽ നിന്നും വകയിരുത്തിയ ഫണ്ട് ഉപയോഗിച്ചാണ് നിർമ്മാണം പൂർത്തീകരിച്ച​ത്. ജില്ലാ പഞ്ചായത്ത് പ്രസിഡന്റ് കെ.വി ബിന്ദു ഉദ്ഘാടനം ചെയ്തു. ജില്ലാ പഞ്ചായത്തംഗം പി.കെ വൈശാഖ് അദ്ധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസി​ഡന്റ് പ്രൊഫ. ടോമിച്ചൻ ജോസഫ്, ഗ്രാമ പഞ്ചായത്തംഗം സുജാത സുശീലൻ, വാർഡ് മെമ്പർ പ്രശാന്ത് മനന്താനം, പി.ഐ.യു പ്രജക്ട് ഡയറക്ടർ ബെവിൻജോൺ വർഗീസ്​, അസി. പ്രോജക്ട് ഡയറക്ടർ ജോതിലക്ഷ്മി എസ്സ്, രാഷ്ട്രീയ കക്ഷി പ്രതിനി​ധി​കളായ അരുൺ ബാബു, കെ.ഡി സുഗതൻ, രാജേഷ്, മഞ്ജീഷ് ബി.ആർ , ബെറ്റി ടോജോ, വില്ലേജ് എക്സ്റ്റൻഷൻ ഓഫീസർ സബി​ത കെ.ദിവാകരൻ തുടങ്ങിയ​വർ പ​ങ്കെ​ടു​ത്തു.