കോ​ട്ടയം: കുറഞ്ഞവി​ല​യിൽ ശുദ്ധമായ കുപ്പിവെള്ളം 'സുജലം' ഇനി റേഷൻകട വഴി ലഭിക്കും. ലിറ്ററിന്​ വെറും പത്തുരൂപയേ വിലയുള്ളൂ. ശബരിമല തീർഥാടകർ ഉൾപ്പെടെ യാത്രക്കാർക്ക്​ ആശ്വാസമാണ്​ പദ്ധ​തി.

പൊതുവിപണിയിൽ ലിറ്ററിന് 15 മുതൽ 20 രൂപ വരെയാണ് വില. ജലവിഭവ വകുപ്പുമായി ചേർന്നാണ്​ പദ്ധതി ആവിഷ്​ക​രി​ച്ചി​രി​ക്കു​ന്നത്. കേരള ഇറിഗേഷൻ ഇൻഫ്രാസ്ട്രക്ചർ ഡെവലപ്‌മെന്റ് കോർപറേഷൻ ഉൽപ്പാദിപ്പിക്കുന്ന 'ഹില്ലി അക്വാ ' വെള്ളമാണ്​ വിൽപ്പനയ്​ക്ക്​ എത്തുന്നത്​. ശബരിമല തീർഥാടനവുമായി ബന്ധപ്പെട്ട്​ കുടിവെള്ളത്തിന്​ അമിത വില ഈടാക്കുന്നുവെന്ന പരാതിക്ക്​ കൂടി പരിഹാരമാകുകയാണ്​ പദ്ധ​തിയിലൂടെ.
ജില്ലയിലെ പ്രധാന ഇടത്താവളമായ എരുമേലി നഗ​രത്തിൽ ആറ്​ റേഷൻകടകളാണുള്ളത്​. പഞ്ചായത്തിലാകെ 26 എണ്ണവും. നഗരത്തിലെ അഞ്ചിടത്തും കാനനപാതയിലെ ഒരിടത്തും വിതരണം ആരംഭിച്ചിട്ടുണ്ട്​. മകരവിളക്ക് മഹോത്സവത്തിനായി എത്തുന്ന തീർത്ഥാടകർക്കും ഈ സൗകര്യം ഏറെ സഹായകരമാകും.

അര,​ഒന്ന്,​ അഞ്ച് ലിറ്ററുകൾ

അരലിറ്റർ, ഒരുലിറ്റർ, അഞ്ചുലിറ്റർ എന്നീ അളവുകളിലാണ്​ കുപ്പിവെള്ളം വിൽക്കുക. യഥാക്രമം എട്ട്, 10, 50 രൂപയാണ്​ വില. നിലവിൽ ഒരു ലിറ്ററിന്റെ വെള്ളമാണ്​ കടകളിലുള്ളത്​. ശബരിമല തീർഥാടനകാലം കണക്കിലെടുത്ത് കൊല്ലം, പത്തനംതിട്ട, കോട്ടയം, ഇടുക്കി, എറണാകുളം ജില്ലകളിലെ റേഷൻ കടകളിലാണ് ആദ്യഘട്ടത്തിൽ പദ്ധതി നടപ്പാക്കുന്നത്​. വിവിധ പരിപാടികൾക്ക്​ കൂടുതൽ വെള്ളം ആവശ്യമുള്ളവർക്ക്​ മുൻകൂട്ടി ഓർഡർ ചെയ്​ത്​ ആവ​ശ്യമുള്ളത്ര വാങ്ങാം. ഒരു ലിറ്റർ എട്ട്​ രൂപയ്​ക്കാണ്​ റേഷൻ വ്യാപാരികൾക്ക്​ നൽകുന്നത്​.