കോട്ടയം : എം.ജി സർവകലാശാലാ കാമ്പസിലെ മരങ്ങളുടെ വിശദ വിവരങ്ങൾ ക്യു ആർ കോഡ് സ്‌കാനിംഗിലൂടെ ഇനി ലഭ്യമാകും. മരങ്ങളിൽ പേരും ക്യു ആർ കോഡും ഉൾപ്പെടുന്ന ബോർഡുകൾ സ്ഥാപിക്കുന്ന ജോലികൾ പൂർത്തിയായി. കാമ്പസിൽ ആകെ 156 ഇനങ്ങളിൽപ്പെട്ട 3731 മരങ്ങളുണ്ടെന്നാണ് കണക്ക്. വിദ്യാർത്ഥികളും സന്ദർശകരും കൂടുതലായി എത്തുന്ന മേഖലകളിലുള്ള മൂന്നൂറോളം മരങ്ങളിലാണ് ഇംഗ്ലീഷിലും മലയാളത്തിലുമുള്ള പേരുകളും ശാസ്ത്രീയ നാമവും ക്യു ആർ കോഡുമുള്ള ബോർഡുകൾ സ്ഥാപിച്ചത്. അഡ്വാൻസ്ഡ് സെന്റർ ഫോർ എൻവയൺമെന്റൽ സ്റ്റഡീസ് ആൻഡ് സസ്റ്റൈനബിൾ ഡെവലപ്പ്മെന്റ് (എ.സി.ഇ.എസ്.എസ്.ഡി) വെള്ളൂരിലെ ട്രോപ്പിക്കൽ ഇൻസ്റ്റിറ്റിറ്റ്യൂട്ട് ഫോർ ഇക്കോളജിക്കൽ സ്റ്റഡീസിന്റെ സഹകരണത്തോടെ നടത്തിയ പരിസ്ഥിതി ഓഡിറ്റിംഗിന്റെ അടിസ്ഥാനത്തിലാണ് ബോർഡുകൾ തയ്യാറാക്കിയത്.

ശാസ്ത്രീയ നാമവും, ലഘുവിവരണവും

കോഡ് സ്‌കാൻ ചെയ്യുമ്പോൾ ലഭിക്കുന്ന വെബ് പേജിൽ മരത്തിന്റെ ചിത്രം, ഇംഗ്ലീഷിലും മലയാളത്തിലുമുള്ള പേര്, ശാസ്ത്രീയ നാമം, ലഘുവിവരണം എന്നിവയാണുള്ളത്. ഉദ്ഘാടനം വൈസ് ചാൻസലർ ഡോ. സി.ടി. അരവിന്ദകുമാർ നിർവഹിച്ചു. ഇതോടനുബന്ധിച്ച് സർവകലാശാലയിലെ മരങ്ങളുടെ ലൊക്കേഷൻ ഉൾപ്പെടെയുള്ള വിശദ വിവരങ്ങൾക്കൊള്ളുന്ന ട്രീസ് ഒഫ് മഹാത്മാഗാന്ധി യൂണിവേഴ്‌സിറ്റി കാമ്പസ് എന്ന പുസ്തകത്തിന്റെ പ്രകാശനവും നടന്നു.



മരങ്ങളെ അടുത്തറിഞ്ഞ് സംരക്ഷിക്കാൻ വിദ്യാർത്ഥികളെയും പൊതുസമൂഹത്തെയും പ്രേരിപ്പിക്കുന്നതിന് ലക്ഷ്യമിട്ടാണ് ബോർഡുകൾ സ്ഥാപിച്ചിരിക്കുന്നത്

ഡോ. എ.പി.തോമസ്, എ.സി.ഇ.എസ്.എസ്.ഡി ഡയറക്ടർ