കോട്ടയം : ന​ഗ​രമ​ദ്ധ്യ​ത്തിൽ പ്രവർത്തിക്കുന്ന ബേ​ക്കർ മെ​മ്മോ​റി​യൽ ഗേൾ​സ് ഹ​യർ​സെ​ക്കൻ​ഡ​റി സ്​കൂ​ളിൽ വൻകവർച്ച. ഇന്നലെ രാവിലെ എ​ട്ടോടെ സ്​കൂൾ തുറക്കാൻ എത്തിയ ജീവനക്കാ​രാണ് മോഷണ വിവരം അ​റി​ഞ്ഞത്. തു​ടർ​ന്ന് പൊ​ലീസിൽ വിവ​രം അ​റി​യി​ച്ചു. ഹൈസ്​കൂൾ ബ്ലോക്കിലും,​ ഹയർ സെക്കൻഡറി ബ്ലോക്കിലുമായി ഒരു ലക്ഷത്തിലേറെ രൂപയുടെ ന​ഷ്ടമാണ് കണക്കാക്കുന്നത്.

ഒരു ഡി.എസ്.എൽ.ആർ ക്യാമറ, സി.സി.ടി.വി ക്യാമറയുടെ ഡി.വി.ആർ (ഡിജിറ്റൽ വീഡിയോ റെക്കോർഡർ), ചാരിറ്റി ബോക്​സിൽ കുട്ടികൾ നിക്ഷേപിച്ച പണം എന്നിവ​യാ​ണ് ക​വർ​ന്ന​ത്. ജീവകാരുണ്യ പ്രവർത്തനങ്ങൾക്കായി വി​ദ്യാർത്ഥികൾ ഒരു വർഷമായി ബാഗിലാ​ക്കി അദ്ധ്യാപക മുറിയിൽ സൂക്ഷിച്ചിരുന്ന 30000 രൂപയാ​ണ് ന​ഷ്ട​മാ​യത്. വിരലടയാള വിദഗ്ദ്ധർ സ്ഥലത്ത് എ​ത്തി പരി​ശോ​ധന​ നട​ത്തി. സ്​കൂളിന്റെ പ്ര​വർ​ത്തനങ്ങൾ കൃത്യമായി നിരീക്ഷിച്ച ശേഷമാണ് മോഷണം നടന്നതെന്ന നിഗമനത്തിലാ​ണ് പൊലീസ്. വെ​സ്റ്റ് പൊലീസ് കേസെടുത്ത് അന്വേഷണം ആരംഭി​ച്ചു.