കോ​ട്ട​യം: ട്രെയിനിൽ മറന്നുവച്ച കണ്ണടയെടുക്കാൻ തിരിച്ചു കയറിയശേഷം ഇറങ്ങാൻ ശ്രമിക്കുന്നതിനിടെ വീണ് വിദ്യാർത്ഥിക്ക് ദാരുണാന്ത്യം. പുതുപ്പള്ളി പരിയാരം ഇടശേരിക്കു​ന്നേൽ ജോർജ് വർ​ക്കിയുടെ​ (ഇടശേരിയിൽ കുന്നേൽ വൺ ഗ്രാം ഗോൾഡ് ജുവലറി ആൻഡ് ട്രാവൽ ഏജൻസി ഉ​ട​മ) മകൻ ദീപക് ജോർജ് വർക്കിയാണ് (26) മരിച്ചത്. ഇന്ന​ലെ പു​ലർച്ചെ 5.30 ഓടെ കോട്ടയം റെയിൽവേ സ്‌​റ്റേ​ഷ​നി​ലായിരുന്നു അപകടം.

പൂനെയിൽ ഹോട്ടൽ മാനേജ്‌മെന്റ്​ വിദ്യാർത്ഥിയായിരുന്ന ദീപക് കോഴ്​സ്​ പൂർത്തിയാക്കിയ ശേഷം പൂനെ- കന്യാകുമാരി എക്​സ്​പ്രസ് ട്രെയിനിൽ നാട്ടിലേ​ക്ക്​ മ​ട​ങ്ങുകയായിരുന്നു. റെയിൽവേ സ്‌​റ്റേഷനിൽ ബാഗുകൾ ഇറക്കിയ ശേ​ഷ​മാണ് ക​ണ്ണ​ട​യു​ടെ കാര്യം ഓർ​ത്തത്. തു​ടർ​ന്ന് തിരിച്ച്​ ക​യ​റി കണ്ണട എടുത്ത് മടങ്ങിയപ്പോഴേക്കും ട്രെയിൻ പ്ലാറ്റ്ഫോം വിട്ടിരുന്നു. ചാടിയിറങ്ങാൻ ശ്രമിച്ചപ്പോൾ ട്രെയിനിന്റെ അടിയിൽപ്പെട്ടു. ശരീരം രണ്ടായി മുറിഞ്ഞു.

കൂട്ടിക്കൊണ്ടു പോകാനെത്തിയ സുഹൃ​ത്തു​ക്കൾ ദീ​പ​ക്കിനെ കാണാതായതോ​ടെ ഫോണിൽ ബ​ന്ധ​പ്പെ​ട്ടെ​ങ്കിലും കിട്ടാത്തതിനെ തു​ടർന്ന് ച​ങ്ങ​നാശേരി, തിരുവല്ല റെയിൽവേ സ്റ്റേഷനുകളിലടക്കം അ​ന്വേ​ഷി​ച്ചു. കോട്ടയം റെയിൽ​വേ പൊലീസ് സ്റ്റേഷനിൽ തിരക്കിയപ്പോ​ഴാണ് അപകട വിവരം അറിഞ്ഞത്. കോട്ടയം മെഡിക്കൽ കോളേജ് ആശുപത്രിയിൽ പോസ്റ്റുമോർട്ടം നടത്തി. മൃതദേഹം മാങ്ങാനം മന്ദിരം ആശുപത്രി മോർച്ച​റി​യിൽ. മാ​താവ്: സോളി. സഹോദരൻ: സന്ദീപ് (ഓസ്‌ട്രേലിയ).