പൊൻകുന്നം : ശലഭ പരിണാമം പോലെ മാനവ പരിണാമം എന്ന ലക്ഷ്യവുമായി എലിക്കുളം ഗ്രാമപഞ്ചായത്തിൽ നടപ്പാക്കുന്ന ശലഭ ഗ്രാമയജ്ഞം പദ്ധതിയുടെ ഉദ്ഘാടനം ഓസ്ട്രിയയിലെ ഇൻസ്ബ്രുക്ക് സർവകലാശാലയിലെ അദ്ധ്യാപകനും തീം സെന്റേർഡ് ഇന്ററാക്ഷൻ അന്താരാഷ്ട്ര ഫെസിലിറ്റേറ്ററുമായ ഡോ. മത്തിയാസ് ഷേറർ നിർവഹിച്ചു. ഇളങ്ങുളം ശാസ്താ ഓഡിറ്റോറിയത്തിൽ നടന്ന ചടങ്ങിൽ സംഘാടക സമിതി ചെയർമാൻ എസ്. ഷാജി അദ്ധ്യക്ഷനായി. പദ്ധതി നടപ്പാക്കുന്നതിലൂടെ ലോകത്തെ ആദ്യ ശലഭഗ്രാമമായി എലിക്കുളം മാറും. മുതിർന്ന പൗരന്മാരെ ജീവിതത്തിന്റെ സന്തോഷകരമായ മൂന്നാംഘട്ടത്തിലേക്ക് നയിക്കുന്ന എം.ജി സർവകലാശാലാ യു3എ (യൂണിവേഴ്‌സിറ്റി ഓഫ് തേഡ് ഏജ് ) പദ്ധതിയും ബട്ടർഫ്ലൈ ഫൗണ്ടേഷൻ ഫോർ ടി.സി.ഐ ഇന്റർനാഷണലും ചേർന്നാണ് ഒക്‌ടോബർ രണ്ട് വരെ പരിപാടി സംഘടിപ്പിക്കുന്നത്. പഞ്ചായത്തിലെ സ്‌കൂൾ, കോളേജ് വിദ്യാർത്ഥികൾ, സ്ത്രീകൾ, അദ്ധ്യാപകർ, പ്രായമായവർ, പ്രത്യേക പരിഗണന ആവശ്യമുള്ളവർ എന്നിങ്ങനെ ആറു വിഭാഗത്തിൽ പെടുന്നവരുടെ സമ്പൂർണ പരിണാമത്തിനാവശ്യമായ പദ്ധതികളാണ് യജ്ഞത്തിലൂടെ നടപ്പാക്കുക.