കോട്ടയം: നവകേരളസദസിൽ ലഭിച്ച നിവേദനങ്ങളുടെ അടിസ്ഥാനത്തിൽ പുതുതായി അനുവദിച്ച മുൻഗണനാ റേഷൻകാർഡുകളുടെ വിതരണത്തിന്റെ കോട്ടയം താലൂക്ക് തല ഉദ്ഘാടനം മന്ത്രി വി.എൻ. വാസവൻ നിർവഹിച്ചു. കുമരകം സ്വദേശി രാജമ്മ മോനച്ചൻ മന്ത്രിയിൽനിന്ന് ആദ്യകാർഡ് ഏറ്റുവാങ്ങി. 20 പേർക്കാണ് കാർഡുകൾ വിതരണം ചെയ്തത്. നവകേരളസദസിൽ ലഭിച്ച നിവേദനങ്ങളിൽ ഏറെയും റേഷൻകാർഡ് തരം മാറ്റുന്നതുമായി ബന്ധപ്പെട്ടാണെന്നു മന്ത്രി വാസവൻ പറഞ്ഞു. കോട്ടയം താലൂക്കിലെ ഏറ്റുമാനൂർ, കോട്ടയം, പുതുപ്പള്ളി മണ്ഡലങ്ങളിൽ നിന്ന് റേഷൻകാർഡുമായി ബന്ധപ്പെട്ട് ആകെ 325 അപേക്ഷകളാണ് ലഭിച്ചത്. നിലവിൽ പൊതുവിഭാഗം റേഷൻകാർഡുകൾ (വെള്ള, നീല) ഉള്ളവരിൽനിന്ന് അപേക്ഷകൾ സ്വീകരിച്ച് പൊതുവിതരണവകുപ്പ് മുൻഗണനാകാർഡുകൾ നൽകുന്നുണ്ട്. ഇത്തരത്തിൽ 2023 ഒക്‌ടോബർ 10 മുതൽ 30 വരെ ഓൺലൈനായി അപേക്ഷിച്ചവരിൽ അർഹരായ 466 പേർക്കും മുൻഗണനാകാർഡുകൾ അനുവദിച്ചു.