കോട്ടയം: സംസ്ഥാനത്തെ മികച്ച ഇലക്ടറൽ ലിറ്ററസി ക്ലബ് ജില്ലാ കോ-ഓർഡിനേറ്റർക്കുള്ള പുരസ്‌കാരം കോട്ടയത്തിന്. ജില്ലാ കോഓർഡിനേറ്ററും പാമ്പാടി കെ.ജി. കോളജ് കൊമേഴ്‌സ് വിഭാഗം അസിസ്റ്റന്റ് പ്രൊഫസറുമായ ഡോ. വിപിൻ കെ. വറുഗീസാണ് പുരസ്‌കാരത്തിന് അർഹനായത്.
തൃക്കാക്കര ഭാരത് മാതാ കോളേജ് ഓഡിറ്റോറിയത്തിൽ നടന്ന ദേശീയ സമ്മതിദാനദിനം സംസ്ഥാനതല ഉദ്ഘാടന വേദിയിൽ മുഖ്യതിരഞ്ഞെടുപ്പ് ഓഫീസറായ സഞ്ജയ് കൗൾ പുരസ്കാരം സമ്മാനിച്ചു. ക്ലബിന്റെ നേതൃത്വത്തിൽ രണ്ടുവർഷം കൊണ്ട് അയ്യായിരത്തിധികം വിദ്യാർത്ഥികൾ, 45 ഭിന്നശേഷിക്കാർ, 52 പട്ടിക വർഗക്കാർ, ഒൻപത് ട്രാൻസ്‌ജെൻഡേഴ്സ് എന്നിവരെ വോട്ടർ പട്ടികയിൽ ഉൾപ്പെടുത്താനായി. ജില്ലാ തിരഞ്ഞെടുപ്പ് വിഭാഗം, സ്വീപ്, ഇലക്ടറൽ ലിറ്ററസി ക്ലബ് എന്നിവയുടെ ഒത്തൊരുമിച്ചുള്ള പ്രവർത്തനമാണ് ജില്ലയെ നേട്ടത്തിലെത്തിച്ചത്.