പത്തനംതിട്ട: നാരങ്ങാനം പഞ്ചായത്തിലെ സി പി എം അംഗത്തിനെതിരെ മതവിദ്വേഷ പ്രചാരണത്തിന് കേസെടുത്തു. അഞ്ചാം വാർഡ് അംഗം ആബിദ ഭായിക്കെതിരെയാണ് കേസെടുത്തത്. ശ്രീരാമന്റെ ഭക്തിഗാനം ഉൾപ്പെടുത്തിക്കൊണ്ടുള്ള വീഡിയോ ആബിദ ഫേസ്ബുക്കിൽ പങ്കുവച്ചിരുന്നു.

ശ്രീരാമന്റെ ഭക്തിഗാനം ഉൾപ്പെടുത്തിക്കൊണ്ട് അർദ്ധനഗ്നനായ ഒരാൾ ഓടുന്നതായിരുന്നു വീഡിയോയിലുണ്ടായിരുന്നത്. 'അയോദ്ധ്യാ പ്രയാണം, ഇന്ത്യ കുതിക്കുന്നു, ഡിജിറ്റൽ യുഗത്തിലേക്കുള്ള ഓട്ടം' എന്ന അടിക്കുറിപ്പും നൽകിയിരുന്നു. ഇതിനെതിരെ നാരങ്ങാനം സ്വദേശി രതീഷാണ് പൊലീസിൽ പരാതി നൽകിയത്.

ഹിന്ദുമത വിശ്വാസത്തെ ഹനിക്കുന്നതാണ് വീഡിയോ എന്ന് ആരോപിച്ചാണ് പരാതി നൽകിയത്. സംഭവം വിവാദമായതോടെ ആബിദ ഫേസ്ബുക്ക് പോസ്റ്റ് ഡിലീറ്റ് ചെയ്യുകയും, മതവിദ്വേഷ പ്രചാരണം ഉദ്ദേശിച്ചില്ലെന്ന് കാണിച്ച് മറ്റൊരു കുറിപ്പ് സോഷ്യൽ മീഡിയയിൽ പങ്കുവയ്ക്കുകയും ചെയ്തിരുന്നു.