കോവളം: 'ടീച്ചർ എന്നോട് ക്ഷമിക്കുക. ഇനി ഞാൻ ആവർത്തിക്കില്ല. എന്റെ വീട്ടുകാർക്കൊന്നും ഇതറിയില്ല. കേസാക്കി ആളുകളെ അറിയിച്ച് എന്നെ അപമാനിക്കരുത്. 'വാഴമുട്ടം ഗവ. ഹൈസ്കൂളിലെ ഹെഡ്മിസ്ട്രസ് വെങ്ങാനൂർ- പനങ്ങോട് സ്വദേശിയായ ശ്രീജയുടെ വീടിനു മുന്നിലെ മതിലിൽ ഇന്നലെ കണ്ട കത്തിലെ വരികളാണിത്.

രാവിലെ ഏഴോടെ മുറ്റമടിക്കാനായി പുറത്തിറങ്ങിയപ്പോഴാണ് മതിലിൽ ഒട്ടിച്ചിരുന്ന കത്തും പ്ലാസ്റ്റിക് ചാക്കുകെട്ടും ശ്രീജയുടെ ശ്രദ്ധയിൽപ്പെട്ടത്.അടുത്തെത്തി കത്ത് പൊട്ടിച്ചു വായിച്ചു. ഉടൻ വീട്ടുകാരെയും തുടർന്ന് കോവളം പൊലീസിനെയും വിവരമറിയിച്ചു.

പൊലീസെത്തി നടത്തിയ പരിശോധനയിൽ ചാക്കിൽ നിന്ന് ലാപ്ടോപ്,പ്രൊജക്ടർ എന്നിവ കണ്ടെടുത്തു.ജനുവരി ഒന്നിന് വാഴമുട്ടം ഗവ. ഹൈസ്കൂളിലെ ഹൈടെക് ക്ലാസ് മുറികളിൽ സൂക്ഷിച്ചിരുന്ന 4 ലക്ഷത്തോളം രൂപ വിലവരുന്ന രണ്ടു ലാപ്ടോപ്പുകളും നാലു പ്രൊജക്ടറുകളും മോഷണം പോയിരുന്നു.

മോഷണമുതൽ സ്കൂൾ ഹെഡ്മിസ്ട്രസിന്റെ വീട്ടിലെത്തിച്ച ശേഷം മോഷ്ടാവ് കത്തെഴുതി വച്ച് മുങ്ങുകയായിരുന്നു. എച്ച്.എമ്മിനെ അപകീർത്തിപ്പെടുത്താനും ശിക്ഷ കിട്ടുന്നതിനുമാകാം മോഷ്ടാവ് ഇത് ചെയ്തതെന്നാണ് പൊലീസ് നിഗമനം.സ്റ്റേഷനിലെത്തിച്ച വസ്തുക്കൾ ഇന്നലെ വൈകിട്ടോടെ വിരലടയാള വിദഗ്ദ്ധരെത്തി പരിശോധിച്ചു.