തിരുവനന്തപുരം: സംസ്ഥാന സർക്കാരുമായുള്ള തർക്കം തുടരുന്നതിനിടെ ഓർഡിനൻസിൽ ഒപ്പിട്ട് ഗവർണർ ആരിഫ് മുഹമ്മദ് ഖാൻ. ജി എസ് ടി നിയമഭേദഗതി ഓർഡിനൻസിൽ രാവിലെ മുംബയ്ക്ക് പോകുന്നതിന് മുമ്പാണ് അദ്ദേഹം ഒപ്പിട്ടത്.

ജൂലായിലെ ജി എസ് ടി കൗൺസിൽ യോഗത്തിന്റെ തീരുമാനപ്രകാരമാണ് ഐ ജി എസ് ടി നിയമത്തിൽ ഭേദഗതി വരുത്താൻ ഓർഡിനൻസ് കൊണ്ടുവന്നത്. പണം വച്ചുള്ള ഓൺലൈൻ ചൂതാട്ടങ്ങൾക്ക് 28ശതമാനം ജി എസ് ടി ചുമത്തുന്നതടക്കമുള്ള കാര്യങ്ങളാണ് ഓർഡിനൻസിലുള്ളത്.

ഗവർണറുടെ അനുമതിക്കായി കഴിഞ്ഞ ആഴ്ചയാണ് ഓർഡിനൻസ് സർക്കാർ രാജ്ഭവന് കൈമാറിയത്. ഓർഡിനൻസിൽ ഗവർണർ ഒപ്പിട്ടതോടെ കേന്ദ്ര ജിഎസ്ടി നിയമത്തിലെ മാറ്റങ്ങൾ സംസ്ഥാനത്തും പ്രാബല്യത്തിലാവും. കേരള ലോകായുക്ത ഭേദഗതി ബിൽ,​ സർവകലാശാല ഭേദഗതി ബിൽ അടക്കം എട്ടോളം ബില്ലുകളാണ് ഗവർ‌ണറുടെ പരിഗണനയിലുള്ളത്.