കാഞ്ഞിരപ്പള്ളി: അനധികൃത മദ്യ വില്പന നടത്തുന്നതിനായി മദ്യം കൈവശം സുക്ഷിച്ച കേസിൽ മദ്ധ്യവയസ്‌കൻ അറസ്റ്റിൽ. കൂവപ്പള്ളി മണ്ണാറക്കയം ഗാന്ധിനഗർ കോളനി വാസനയിൽ സക്കീർ (59) നെയാണ് കാഞ്ഞിരപ്പള്ളി പൊലീസ് അറസ്റ്റ് ചെയ്തത്. കാഞ്ഞിരപ്പള്ളി മണിമല റോഡിലെ മണ്ണാറക്കയം പാലത്തിന് സമീപം അനധികൃതമായി വിദേശ മദ്യ വില്പന നടത്തുന്നുണ്ടെന്ന് ജില്ലാ പൊലീസ് മേധാവി കെ. കാർത്തിക്കിന് ലഭിച്ച രഹസ്യ വിവരത്തെ തുടർന്ന് കാഞ്ഞിരപ്പള്ളി പൊലീസ് നടത്തിയ പരിശോധനയിലാണ് ഇയാളെ വിദേശമദ്യവുമായി പിടികൂടുന്നത്. ബിഗ് ഷോപ്പറിൽ സുക്ഷിച്ച നിലയിൽ 500 മില്ലി വീതമുള്ള 9 കുപ്പികളിലായി നാലര ലിറ്റർ വിദേശമദ്യം പിടികൂടുകയും ചെയ്തു. എസ്.എച്ച്.ഒ നിർമൽ ബോസ്, എസ്.ഐ രാജേഷ്, സി.പി.ഒമാരായ ബിനോ, പീറ്റർ എന്നിവർ ചേർന്നാണ് അറസ്റ്റ് ചെയ്തത്. ഇയാൾക്ക് കാഞ്ഞിരപ്പള്ളി സ്റ്റേഷനിൽ ക്രിമിനൽ കേസ് നിലവിലുണ്ട്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.