തെലുങ്ക് സൂപ്പർതാരങ്ങളായ വിജയ് ദേവരകൊണ്ടയും രശ്മിക മന്ദാനയും പ്രണയത്തിലാണ് എന്ന തരത്തിലുള്ള വാർത്തകൾ കഴിഞ്ഞ നാല് വർഷമായി പ്രചരിച്ചുകൊണ്ടിരിക്കുകയാണ്. എന്നിരുന്നാലും ഇക്കാര്യത്തിൽ താരങ്ങൾ ഇതുവരെ പ്രതികരണം നടത്തിയിട്ടില്ല. ഇപ്പോഴിതാ ഇരുവരുടെയും വിവാഹ നിശ്ചയം ഉടനുണ്ടാവുമെന്ന റിപ്പോർട്ട് പുറത്തുവിട്ടിരിക്കുകയാണ് ഒരു തെലുങ്ക് മാദ്ധ്യമം.

ഫെബ്രുവരി രണ്ടാംവാരം വിജയുടെയും രശ്‌മികയുടെയും വിവാഹനിശ്ചയം ഉണ്ടാകുമെന്ന് ന്യൂസ് 18 തെലുങ്ക് ആണ് റിപ്പോർട്ട് ചെയ്തത്. ഇക്കാര്യം താരങ്ങൾ ഉടൻ പ്രഖ്യാപിക്കുമെന്നും റിപ്പോർട്ടിൽ പറയുന്നു. എന്നാൽ ഇക്കാര്യത്തിൽ ഇരുവരും പ്രതികരണം നടത്തിയിട്ടില്ല. അടുത്തിടെ വിജയുടെ ഹൈദരാബാദിലെ വീട്ടിൽ ഇരുവരും ദീപാവലി ആഘോഷിച്ചതിന്റെ ചിത്രങ്ങൾ പുറത്തുവന്നിരുന്നു. ഇതിനുശേഷമാണ് ഇരുവരും പ്രണയത്തിലാണെന്ന അഭ്യൂഹം ശക്തമായത്.

ഇതിന് മുമ്പും പല തവണ ഇരുവരുടെയും വിവാഹ വാർത്തകളും താരങ്ങൾ തമ്മിൽ പ്രണയത്തിലാണെന്ന തരത്തിലുള്ള വാർത്തകളും മാദ്ധ്യമങ്ങളിൽ പ്രത്യക്ഷപ്പെട്ടിട്ടുണ്ട്. എന്നാൽ അപ്പോഴെല്ലാം തങ്ങൾ വളരെ അടുത്ത സുഹൃത്തുക്കളാണെന്നും മറ്റുള്ള വാർത്തകളെല്ലാം അസംബന്ധമാണെന്നുമുള്ള രീതിയിൽ ഇരുവരും പ്രതികരിച്ചിരുന്നു. ഇരുവരും ഒരുമിച്ച് അവധിക്കാലം ആഘോഷിച്ചതിന്റെ ചിത്രങ്ങളും ഏറെ വൈറലായിരുന്നു. മാച്ചിംഗ് വസ്ത്രങ്ങൾ അണിഞ്ഞ് താരങ്ങൾ പ്രത്യക്ഷപ്പെടുന്നതും ആരാധകരുടെ സംശയം വർദ്ധിപ്പിച്ചു.

രണ്ട് ചിത്രങ്ങളിലാണ് വിജയും രശ്മികയും ഒന്നിച്ചഭിനയിച്ചിട്ടുള്ളത്. 2018ൽ പരശുറാം സംവിധാനം ചെയ്ത റൊമാന്റിക് കോമഡി 'ഗീത ഗോവിന്ദം', 2019ൽ ഭരത് കമ്മ സംവിധാനം ചെയ്ത റൊമാന്റിക് ആക്ഷൻ ഡ്രാമ 'ഡിയർ കോമ്രേഡ്' എന്നീ ചിത്രങ്ങളിലൂടെയാണ് ഈ താരജോഡികളെ പ്രേക്ഷകർ ഏറ്റെടുത്തത്. വൻ ഹിറ്റായ ചിത്രങ്ങൾ 100 കോടിയിലധികം നേടി ബോക്സ് ഓഫീസ് ബ്ലോക്ക് ബസ്റ്റർ ആയി മാറുകയും ചെയ്തിരുന്നു.

രൺബീർ കപൂർ നായകനായ ബ്ളോക്ക്‌ബസ്റ്റർ ചിത്രം 'അനിമൽ' ആണ് രശ്‌മികയുടേതായി ഏറ്റവും ഒടുവിൽ പുറത്തിറങ്ങിയ സിനിമ. ലോകത്താകമാനമായി 800 കോടിയിലധികമാണ് അനിമൽ നേടിയത്. അല്ലു അർജുൻ നായകനായെത്തിയ സൂപ്പർ ഹിറ്റ് സിനിമയായ പുഷ്പയുടെ രണ്ടാം ഭാഗത്തിലാണ് രശ്മികയിപ്പോൾ അഭിനയിച്ചുകൊണ്ടിരിക്കുന്നത്. 'റെയിൻബോ', 'ദി ഗേൾഫ്രണ്ട്', 'ചാവ' എന്നിവയാണ് താരത്തിന്റേതായി പുറത്തിറങ്ങാനുള്ള മറ്റ് സിനിമകൾ. പരശുറാം പെറ്റ്‌ല സംവിധാനം ചെയ്യുന്ന 'ഫാമിലി സ്റ്റാർ', ഗൗതം തിന്നനൂരി സംവിധാനം ചെയ്യുന്ന 'വിഡി12' എന്നിവയാണ് വിജയ് ദേവരകൊണ്ടയുടേതായി പുറത്തിറങ്ങാനുള്ള ഏറ്റവും പുതിയ സിനിമകൾ.